តាមកម្មវិធីដែលបានគ្រោងទុក នៅព្រឹកថ្ងៃទី៧ ខែឧសភា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំ​គណៈប្រតិភូ​ជាន់​ខ្ពស់​អញ្ជើញ​ចូល​រួម​កិច្ច​ប្រជុំ​អាស៊ាន នៅទីក្រុងសេប៊ូ ប្រទេសហ្វីលីពីន នាចុងសប្ដាហ៍នេះ ខណៈសម្តេចធិបតី​ក៏​នឹង​មាន​ជំនួប​ទ្វេភាគីជាមួយជាមួយមេដឹកនាំប្រទេសសមាជិកអាស៊ានមួយចំនួនផងដែរ។

ឯកឧត្តម ចាន់ រតនា អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បាន​មាន​ប្រសាសន៍​ប្រាប់ ​BTV នៅព្រឹកថ្ងៃទី៤ ខែឧសភា ឆ្នាំ២០២៦ នេះថា ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំ​គណៈ​ប្រតិភូ​ជាន់​ខ្ពស់​អញ្ជើញ​ចូល​រួមកិច្ចប្រជុំអាស៊ាន នៅទីក្រុងសេប៊ូ ប្រទេសហ្វីលីពីន នៅថ្ងៃទី៨ ខែឧសភា ឆ្នាំ​២០២៦ ​ខាងមុខនេះ។ ហើយកិច្ចប្រជុំអាស៊ានេះ ជាធម្មតាមានរបៀបវារៈ​សម្រាប់​កិច្ច​ពិភាក្សាក្នុ​ង​ចំ​ណោម​ថ្នាក់ដឹកនាំរបស់អាស៊ាន ដោយក្នុងនោះនិយាយអំពីការកសាងសហគមន៍អាស៊ាន និង​មាន​ការ​ផ្លាស់​ប្តូរយោបល់គ្នាអំពីបញ្ហាតំបន់ និងអន្តរជាតិ ជាពិសេសបញ្ហានៅមជ្ឈឹមបូព៌ា។ នៅ​ក្នុង​ឱកាស​នោះ​ដែរ សម្តេចធិបតី ហ៊ុន ម៉ាណែត គ្រោងនឹងមានជំនួប​ទ្វេភាគី​ជាមួយ​ប្រទេស​សមាជិក​អាស៊ាន​មួយ​ចំនួន​ផងដែរ។ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និង​សហ​ប្រតិបត្តិការអន្តរជាតិ នឹងអមដំណើរទៅជាមួយសម្តេចធិបតី ហ៊ុន ម៉ាណែត ផងដែរ។ ព្រោះ​នៅ​ក្នុង​នោះក៏មានកិច្ចប្រជុំរដ្ឋមន្ត្រីការបរទេសអាស៊ានផងដែរ។

ក្នុងកិច្ចប្រជុំសន្និសីទ​អាស៊ាននៅថ្ងៃទី៧-៨ ខែឧសភា ឆ្នាំ២០២៦ នៅទីក្រុងសេប៊ូ ប្រទេស​ហ្វីលីពីន​ ដែលដឹកនាំដោយប្រទេសហ្វីលីពីន ប្រធានអាស៊ានប្តូរវេន ដោយក្នុងនោះ​របៀប​វារៈ​ដែល​នឹង​លើក​យក​មក​ពិភាក្សា គឺពាក់ព័ន្ធបញ្ហាភូមិសាស្ត្រ​នយោបាយ​ដែល​កំពុង​តែ​មាន​ការ​ប្រែ​ប្រួ​​ល ក៏ដូចជាបញ្ហាសន្តិសុខ ការធ្វើសមាហរណកម្មសេដ្ឋកិច្ច ការពង្រឹងនូវថាមពល ការ​ពង្រឹង​នូវ​ការ​សម្រប​សម្រួលដឹកជញ្ជូនជាដើម។ ហើយនៅថ្ងៃទី៧ ខែឧសភា នឹងមានការ​រៀបចំ​កិច្ច​ប្រជុំ​ជា​មុន​នៅ​រដ្ឋមន្ត្រីក្រសួងការបរទេសអាស៊ាន និងនៅថ្ងៃទី៨ ខែឧសភា នឹងមានកិច្ចប្រជុំថ្នាក់ដឹកនាំ ដោយ​សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានឹងចូលរួម។ ដែលនេះ​គឺ​ជាកា​រ​ជួប​គ្នា​លើក​ដំបូង​រវាងនាយករដ្ឋមន្ត្រីកម្ពុជា-ថៃ ដោយរំពឹងថានឹងមានការពិភាក្សាអំពីបញ្ហាជម្លោះព្រំដែន និង​បញ្ហាថៃឈ្លានពានមកលើកម្ពុជាផងដែរ៕ អត្ថបទ៖ វង្ស សុភាព