​វាយ​កូន​បាល់៖ ​ម្ចាស់​មេដាយមាស​អូឡាំពិក​ទីក្រុង​តូ​ក្យូ កីឡាការិនី​ស្វ៊ី​ស Belinda Bencic បាន​ប្រជែង​ឈ្នះ​ជើងឯក​កម្មវិធី WTA Charleston នៅ​ទឹកដី​អាមេរិក​ ក្រោយ​យកឈ្នះ​កីឡាការិនី​ទុយ​នេ​ស៊ី Ons Jabeur នៅ​វគ្គ​ផ្តាច់ព្រ័ត្រ​។ ​​កីឡាការិនី​វ័យ ២៥ឆ្នាំ Belinda Bencic ត្រូវការ​ពេល​ដល់​ទៅ ២ម៉ោង ៣៥នាទី​ទើប​អាច​យកឈ្នះ Ons Jabeur បាន​ដោយ​លទ្ធផល ៦-១, ៥-៧ និង ៦-៤​។

​​នេះ​ជា​ពាន​នៅក្នុង​ក្របខណ្ឌ WTA លើក​ទី៦ សំរាប់ Belinda Bencic និង​ជា​កីឡាការិនី​ស្វ៊ី​ស​ទី១ ដែល​ឈ្នះ​ការប្រកួត​ពាន WTA Charleston នេះ​រាប់​ពី​ឆ្នាំ១៩៩៩ ដែល​ធ្វើបាន​ដោយ Martina Hingis​។​ ​​ដោយឡែក​សំរាប់​លទ្ធផល​ការប្រកួត​ពាន​ផ្សេងៗ​ទៀត​ចុង​សប្តាហ៍​កន្លងទៅ កីឡាករ​ប៊ែ​ល​ហ្សិ​ក David Goffin បាន​យកឈ្នះ​ជើងឯក​ពានរង្វាន់ Grand Prix Hassan II នៅ​ប្រទេស​ម៉ា​រ៉ុ​ក​ក្រោយ​យកឈ្នះ​កីឡាករ​ស្លូ​វ៉ា​គី Alex Molcan នៅ​វគ្គ​ផ្តាច់ព្រ័ត្រ​លទ្ធផល ៣-៦, ៦-៣ និង ៦-៣​។ ​​ជ័យជំនះ​ធ្វើឱ្យ David Goffin ដែល​ធ្លាប់មាន​ចំណាត់ថ្នាក់​លេខ ៧ ពិភពលោក​កាលពីមុន​នោះនឹង​ហក់​ឡើងមក​ក្នុង Top 50 វិញ​នៅក្នុង​ថ្ងៃ​ចន្ទ​នេះ​។​

​​ចំណែកឯ​កីឡាករ​អាមេរិក Reily Opelka បាន​យកឈ្នះ​មិត្ត​រួម​ជាតិ John Isner ដើម្បី​គ្រង​ជើងឯក​ពានរង្វាន់ Men’s Clay Court Championship នៅ​ទីក្រុង Houston រដ្ឋ​តិច​សាស​សហរដ្ឋអាមេរិក​។ ​​Opelka យកឈ្នះ Isner ដោយ​លទ្ធផល ៦-៣, ៧-៦(៩-៧) ដើម្បី​លើក​ពាន​ទី៤ នៃ ATP Tour និង​ជា​ពាន​ដំបូង​នៅលើ​ទីលាន​ដីក្រហម​៕

​អត្ថបទ​៖​នាង សុភា​វុ​ធ