ធនាគារអភិវឌ្ឍន៍អាស៊ី (ADB) បាននិយាយកាលពីថ្ងៃអាទិត្យថា ខ្លួននឹងផ្តល់ជំនួយរហូតដល់ ៧០ ពាន់លានដុល្លារអាមេរិក នៅឆ្នាំ ២០៣៥ ដល់គំនិតផ្តួចផ្តើមពីរ ដើម្បីរួមបញ្ចូលបណ្តាញអគ្គិសនី ពង្រីកពាណិជ្ជកម្មអគ្គិសនីឆ្លងកាត់ព្រំដែន និងការកែលម្អគុណភាពនៃការតភ្ជាប់អ៊ីនធឺណិតល្បឿនលឿន នៅទូទាំងតំបន់អាស៊ី-ប៉ាស៊ីហ្វិក។

លោក Masato Kanda ប្រធានធនាគារអភិវឌ្ឍន៍អាស៊ី បានបើកដំណើរការគំនិតផ្តួចផ្តើមបណ្តាញអគ្គិសនី Pan-Asia និងផ្លូវហាយវេឌីជីថលអាស៊ី-ប៉ាស៊ីហ្វិក នៅក្នុងកិច្ចប្រជុំប្រចាំឆ្នាំលើកទី ៥៩ របស់ធនាគារនេះ នៅទីក្រុង Samarkand ដែលជាទីក្រុងធំទី ២ របស់ប្រទេសអ៊ូសបេគីស្ថាន។

លោក Kanda បាននិយាយថា៖«ថាមពល និងការចូលប្រើឌីជីថល នឹងកំណត់អនាគតរបស់តំបន់នេះ ដោយបន្ថែមថា តាមរយៈ «ការភ្ជាប់បណ្តាញអគ្គិសនី និងបណ្តាញឌីជីថលឆ្លងកាត់ព្រំដែន យើងអាចកាត់បន្ថយថ្លៃដើម ពង្រីកឱកាស និងនាំមកនូវថាមពល និងចូលប្រើឌីជីថលដែលអាចទុកចិត្តបានដល់មនុស្សរាប់រយលាននាក់»។

យោងតាមលោក Kanda គំនិតផ្តួចផ្តើមបណ្តាញអគ្គិសនី Pan-Asia ស្វែងរកការតភ្ជាប់ប្រព័ន្ធថាមពលជាតិ និងអនុតំបន់ ដើម្បីឲ្យលំហូរថាមពលកកើតឡើងវិញឆ្លងកាត់ព្រំដែន។ ផ្លូវហាយវេឌីជីថលអាស៊ី-ប៉ាស៊ីហ្វិក មានគោលបំណងកាត់បន្ថយគម្លាតហេដ្ឋារចនាសម្ព័ន្ធឌីជីថល និងជួយតំបន់នេះទាញយកផលប្រយោជន៍ពីកំណើនដែលជំរុញដោយបញ្ញាសិប្បនិម្មិត (AI)៕