អ៊ីស្រាអែល បានធ្វើការវាយប្រហារតាមអាកាសយ៉ាងខ្លាំងនៅភាគខាងត្បូងប្រទេសលីបង់ កាលពីថ្ងៃអាទិត្យ បន្ទាប់ពីបានចេញការព្រមានជាថ្មីអំពីការជម្លៀសប្រជាជនសម្រាប់ភូមិនានាដែលនៅហួសពីតំបន់ដែលខ្លួនកាន់កាប់ ទោះបីជាមានបទឈប់បាញ់ជាមួយលីបង់ក្នុងបំណងបញ្ឈប់ការប្រយុទ្ធជាមួយក្រុមហេសបូឡាក៏ដោយ។

អ្នកនាំពាក្យយោធានិយាយភាសាអារ៉ាប់ លោក Avichay Adraee បានបង្ហោះនៅលើបណ្តាញ X ថា «ដើម្បីសុវត្ថិភាពរបស់អ្នក អ្នកត្រូវតែជម្លៀសចេញពីលំនៅឋានរបស់អ្នកជាបន្ទាន់ ហើយចេញឆ្ងាយពីភូមិ និងទីប្រជុំជននានាយ៉ាងហោចណាស់១.០០០ម៉ែត្រទៅកាន់ទីវាល»។

ការព្រមាននេះ គ្របដណ្តប់លើភូមិ និងទីប្រជុំជនជាង១០កន្លែងរួមទាំងភូមិជាច្រើននៅក្នុងស្រុក Nabatieh ស្ថិតនៅភាគខាងជើងនៃទន្លេ Litani ដែលនៅភាគខាងត្បូងអ៊ីស្រាអែលបានដាក់មូលដ្ឋានកងទ័ព។ នាយសេនាធិការយោធាអ៊ីស្រាអែល លោក Eyal Zamir បានគំរាមវាយប្រហារក្រុមហេសបូឡា «ហួសពីខ្សែបន្ទាត់លឿង»។

លោកបាននិយាយក្នុងអំឡុងពេលចុះពិនិត្យកងទ័ពអ៊ីស្រាអែលថា «ការគំរាមកំហែងណាមួយ នៅគ្រប់ទីកន្លែង ដែលប្រឆាំងនឹងសហគមន៍ ឬកងកម្លាំងរបស់យើង រួមទាំងហួសពីខ្សែបន្ទាត់លឿង និងនៅភាគខាងជើងនៃទន្លេ Litani នឹងត្រូវបានកម្ចាត់»។ យោធាអ៊ីស្រាអែល បាននិយាយកាលពីថ្ងៃអាទិត្យថា ខ្លួនកំពុងធ្វើប្រតិបត្តិការប្រឆាំងក្រុមហេសបូឡា បន្ទាប់ពីអ្វីដែលខ្លួនបានពិពណ៌នាថាជាការរំលោភលើកិច្ចព្រមព្រៀងបទឈប់បាញ់ថ្ងៃទី ១៧ ខែមេសា ដោយព្រមានថា នរណាម្នាក់ដែលនៅជិតអ្នកប្រយុទ្ធ ឬទីតាំងរបស់ក្រុមហេសបូឡា អាចប្រឈមនឹងហានិភ័យ។