តុលាការស៊ុយអែតនៅថ្ងៃចន្ទនេះ បានកាត់ទោសបុរសអាយុ ៥៥ ឆ្នាំម្នាក់ ឲ្យជាប់ពន្ធនាគារអស់មួយជីវិតចំពោះតួនាទីរបស់ខ្លួន ក្នុងឧក្រិដ្ឋកម្មសង្គ្រាម អំឡុងសង្គ្រាមស៊ីវិលស៊ីរី ក្នុងឆ្នាំ ២០១២ និង ២០១៣។

តុលាការបានរកឃើញថា បុរសនោះមានទោសពីបទចូលរួមក្នុងការបាញ់ប្រហារប្រឆាំងនឹងការតវ៉ាដោយសន្តិវិធី ក្នុងខែកក្កដា ឆ្នាំ ២០១២ នៅជាយក្រុង Yarmouk,នៃទីក្រុងដាម៉ាស ជាកន្លែងដែលអ្នកតវ៉ាជាច្រើននាក់ ត្រូវបានសម្លាប់។ នេះបើយោងតាមសេចក្តីថ្លែងការណ៍មួយ។

តុលាការក៏បានរកឃើញផងដែរថា បុរសរូបនេះ បានបម្រើការនៅរបាំងផ្លូវ ដែលបង្កើតឡើងដោយរដ្ឋាភិបាលស៊ីរី នៅក្នុងតំបន់នោះ ចាប់ពីខែធ្នូ ឆ្នាំ ២០១២ ដល់ខែកក្កដា ឆ្នាំ ២០១៣ ជាទីដែល «ជនស៊ីវិលមួយចំនួនធំ» ត្រូវបានចាប់ខ្លួន និងនាំទៅធ្វើទារុណកម្ម និងក្នុងករណីខ្លះ ត្រូវបានសម្លាប់។

យោងតាមតុលាការនេះ បទល្មើសទាំងពីរ បានកើតឡើង ជាផ្នែកមួយនៃសង្គ្រាមស៊ីវិលស៊ីរី ដែលបង្កឡើងដោយការមិនពេញចិត្តរបស់ប្រជាជនចំពោះការគ្រប់គ្រងរបស់មេដឹកនាំកាន់អំណាចយូរ លោក បាសា អាល់អាសាដ៕