ភ្នំពេញ៖ ប្រជាពលរដ្ឋរស់នៅធ្វើការ និងសិក្សានៅរាជធានីភ្នំពេញ កំពុងបន្តចាកចេញពីរាជធានីភ្នំពេញ ទៅតាមស្រុកកំណើត និងខេត្តគោលដៅទេសចរណ៍។ ការចាកចេញពីរាជធានីភ្នំពេញនេះ គឺអាចបន្តរហូតដល់ថ្ងៃ ១៤ ខែមេសា ជាថ្ងៃឈប់សម្រាកផ្លូវការទូទាំងប្រទេស។

ខណៈពេលពិធីបុណ្យចូលឆ្នាំប្រពៃណីជាតិខ្មែរ កាន់តែខិតចូលមកដល់ លំហូរនៃការធ្វើដំណើរចាក​ចេញពីរាជធានីភ្នំពេញ ទៅតាមបណ្ដាខេត្តជាស្រុកកំណើត ​និងខេត្តគោលដៅទេសចរណ៍ ក៏ចាប់ផ្ដើមមានការកើនឡើងផងដែរ។

ការធ្វើដំណើរចាកចេញ ឃើញមានការកើនឡើងតាំងពីថ្ងៃអាទិត្យមកម្ល៉េះដោយសាររោងចក្រមួយចំនួន ទទួលបានការ​ឈប់​សម្រាក​រយៈពេលរហូតដល់​ពេញមួយសប្ដាហ៍។

ជាក់ស្ដែងសម្រាប់ព្រឹកថ្ងៃចន្ទនេះ ក៏មានចំនួនប្រជាពលរដ្ឋបានមករង់ចាំដើម្បីធ្វើដំណើរ​តាមរថយន្ត​ដឹកដំណើរ និង​រថយន្ត​ឈ្នួល​នៅ​ចំណុចជុំវិញផ្សារថ្មីផងដែរ។​ ស្រ្តីមួយរូប ​និងសមាជិកក្រុមគ្រួសារ ដែលទើបធ្វើដំណើរមកពីប្រទេស ​ប៊េហ្សិក ​បានបញ្ជាក់ប្រាប់​ BTVថា ​ក្រុម​គ្រួសារគាត់ គឺ​កំពុងរង់ចាំ​រថយន្តដើម្បីធ្វើដំណើរទៅលេងកំសាន្តនៅខេត្តសៀមរាប សម្រាប់ឱកាសចូលឆ្នាំខ្មែរ។ ក្នុងនាមជាគាត់ជាជនជាតិខ្មែររស់នៅបរទេស គាត់ពិតជាសប្បាយចិត្តពេល​មើលឃើញពីភាព​រីកចំរើន​របស់កម្ពុជា។

សម្រាប់ស្រ្តីមួយរូបទៀត ដែលកំពុងរង់ចាំរថយន្តផងដែរនោះ លើកឡើងថា ​គាត់និងក្រុមគ្រួសារ មិត្តភ័ក្ដិ​ គឺកំពុងរង់ចាំធ្វើដំណើរទៅស្រុកកំណើត ​ដើម្បីជួបជបងប្អូន។ គាត់ថាការចាកចេញ​នៅឆ្នាំនេះ​ គឺចាកចេញទាំងសប្បាយចិត្ត​ ដោយមិនសូវមានការព្រួយបារម្ភនោះទេ។

សម្រាប់ឆ្នាំនេះ ទោះមានការចាកចេញពីភ្នំពេញ ​ទៅបណ្ដាខេត្តយ៉ាងណាក្ដី ​តែលោក​ សេង គឹមស្រៀង​ ជាអ្នកបើករថយន្តឈ្នួលគោលដៅពីភ្នំពេញ ​ទៅខេត្តកំពង់ឆ្នាំង លើកឡើងថា​សម្រាប់​ឆ្នាំនេះ គាត់ហាកពិបាកក្នុងការស្វែងរកភ្ញៀវជាងរាល់ឆ្នាំ។

លោកថា កម្មករកម្មការិនី​ សព្វថ្ងៃមានម៉ូតូដោយខ្លួនឯង​ បែបនេះ​គេទៅស្រុកកំណើត​ដោយជិះម៉ូតូ ព្រោះពីភ្នំពេញ​ទៅខេត្តកំពង់ឆ្នាំង​ ក៏មិនសូវឆ្ងាយ។

ការរៀបចំប្រារព្ធពិធីចូលឆ្នាំប្រពៃណីជាតិខ្មែរឆ្នាំ ២០២២នេះ ជាការរៀបចំលើកដំបូងរបស់កម្ពុជា ក្រោយមានវត្តមានវត្តមានកូវីដ។ ​តាមរាជធានី-ខេត្ត ជាច្រើនក៏បានរៀបចំ កម្មវិធីសង្រ្កាន្ត​និងតុបតែងយ៉ាងស្រស់ស្អាត ដើម្បីផ្ដល់ភាពសប្បាយជូនប្រជាពលរដ្ឋ។

ការរៀបចំកម្មវិធីចូលឆ្នាំប្រពៃណីជាតិខ្មែរនេះ ​ក៏ស្របពេលដែលកម្ពុជា​ មានករណីឆ្លងកូវីដធ្លាក់ចុះ មកត្រឹម ២ខ្ទង់ប្រចាំថ្ងៃ ​និងស្របពេលដែលកម្ពុជា​សម្រេច​ជោគជ័យធំធេង​លើ​ការ​ចាក់វ៉ាក់សាំង​ជូនប្រជាពលរដ្ឋ៕ អត្ថបទ៖ គឺមហុក