មណ្ឌលគិរី៖ អ្នកជំនាញទេសចរណ៍ថា ខេត្តមណ្ឌលគិរី នឹងក្លាយជាខេត្តគោលដៅទេសចរណ៍ដ៏សំខាន់របស់កម្ពុជា ខណៈខេត្តនៅតំបន់ភូមិភាគឦសានមួយនេះ សំបូរទៅដោយធនធានធម្មជាតិប្រកបដោយសក្តានុពល ដែលនឹងអាចទាក់ទាញភ្ញៀវទេសចរណ៍ បន្ទាប់ពីតំបន់ទេសចរណ៍វប្បធម៌ប្រវត្តិសាស្រ្ត តំបន់មាត់សមុទ្ររបស់កម្ពុជា។

លោក ធឿន វុឌ្ឍី នាយកប្រតិបត្តិក្រុមហ៊ុនទេសចរណ៍ "មរតក អៅដរ (Morodok Outdoor) លើកឡើងក្នុងកិច្ចសម្ភាសន៍ ជាមួយភ្នាក់ងារអ្នកយកព័ត៌មាន BTV ស្តីពីការអភិវឌ្ឍវិស័យ​ទេសចរណ៍​ខេត្តមណ្ឌលគិរី​ នៅថ្ងៃទី១១ ​ខែមេសាឆ្នាំ២០២២នេះថា បន្ទាប់ពីរាជរដ្ឋាភិបាលបើក​ប្រទេស​ទាំងស្រុង គ្មានកា​រ​រឹតត្បិត​ឯកសារ ​ឬការរឹតត្បិតលើការធ្វើចត្តាឡីស័កដូចមុន ក្នុង​រយៈពេល​ជាង ២ខែ ចុងក្រោយនេះ វិស័យ​ទេសចរណ៍មាន​សញ្ញាណវិជ្ជមាននៃការងើប​ឡើងវិញជាបណ្តើរៗ ដោយយើងរំពឹងថា កម្ពុជានឹស្រូបយកកំណើនពីវិស័យទេសចរណ៍ជាបន្តបន្ទាប់ ខណៈដែល​រាជ​រដ្ឋាភិបាល ​ក៏ដូចក្រសួងស្ថាប័នពាក់ព័ន្ធបានកំពុងខិតខំរៀបចំ និងដាក់ចេញវិធានការជាច្រើន​នៅលើវិស័យនេះ។

ចំណែកអភិវឌ្ឍន៍វិស័យទេសចរណ៍ខេត្តមណ្ឌលគិរី លោកបានថ្លែងនូវការសាទយ៉ាងកក់ក្តៅ ចំពោះការគិតគូរ​ដ៏ខ្ពង់ខ្ពស់របស់ រាជរដ្ឋាភិបាល ​តាមរយៈនៃការដាក់ឱ្យអនុវត្តជាផ្លូវការនូវ «ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី​ (២០១១-២០៣៥) នេះគឺជាផែនទីបង្ហាញ​ផ្លូវយ៉ាងសំខាន់ ​សម្រាប់ទាក់ទាញទេសចរណ៍បន្ថែម​ និងជាការរអភិវឌ្ឍន៍ជំហាន​ថ្មីមួយទៀត ដែល​ខេត្តមួយនេះ ជាគោលដៅអេកូទេសចរណ៍ ​បន្ទាប់ពីកម្ពុជាមានតំបន់វប្បធម៌​ប្រវត្តិសាស្រ្ត និង​តំបន់មាត់សមុទ្រ​ដែលកំពុងទាក់ទាញភ្ញៀវទេសចរណ៍។

ចំណែកលោកស្រី ខៃ ចិន្តា សមាជិកស្ថាបនិកគ្រប់គ្រងសណ្ឋាគារនៅភូមិភាគឦសាន បាន​ថ្លែង​នូវ​ការ​ស្វាគមន៍ចំពោះការដាក់ឲ្យប្រើប្រាស់ផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ដែលផែនការនេះ ​គឺជាការកំណត់នូវទិសដៅ​ច្បាស់លាស់​របស់រាជរដ្ឋាភិបាល ​ខណៈដែល​ខេត្តនៅ​ភូមិភាគឦសាន ​គឺជាខេត្តមានសកម្មភាព​បែបអេកូទេសចរណ៍​ ទេសចរណ៍ធម្មជាតិ និង​ភ្ជាប់​ជា​មួយ​ទេសចរណ៍វប្បធម៌​ជនជាតិ​ដើមភាគតិចជាដើម, ​ដូច្នេះចំពោះការគិតអភិវឌ្ឍន៍របស់រាជ​រដ្ឋាភិបាល​នៅភូមិភាគឦសាន គឺជាការចូលចំណែកអភិវឌ្ឍន៍សហគមន៍មូលដ្ឋាន និងជាផ្នែកមួយយ៉ាង​សំខាន់​ក្នុងការចូលរួមអភិវឌ្ឍន៍សេដ្ឋកិច្ច-សង្គមជាតិយើង។

សូមបញ្ជាក់ថា៖ ផែនការមេសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី​ (២០២១-២០៣៥) របស់រាជរដ្ឋាភិបាល ​បានកំណត់តំបន់អាទិភាពសំខាន់ៗចំនួន ៦រួមមាន៖ តំបន់របៀង​អេកូទេស​ចរណ៍ ​និងទេសចរណ៍ធម្មជាតិ​នៃដែនជម្រកសត្វព្រៃទាំង ៥, តំបន់របៀងទេសចរណ៍​វប្បធម៌ និងអេកូទេសចរណ៍ ប៊ូស្រា-ដាក់ដាំ ដែលលើកទឹកចិត្តឲ្យមាន​ការ​អភិវឌ្ឍ​តែសកម្មភាព​អេកូ​ទេសចរណ៍ និងទេសចរណ៍ធម្មជាតិ ​ភ្ជាប់ជាមួយទេសចរណ៍វប្បធម៌​ជនជាតិដើមភាគតិច ។ ចំណែកក្រុង​សែន​មនោរម្យជាបណ្តុំ​សកម្មភាពទេសចរណ៍ពហុបំណង,តំបន់ស្រុកអូររាំង ភ្ជាប់​ជាមួយគម្រោងអភិវឌ្ឍន៍​ព្រលានយន្តហោះខេត្តមណ្ឌលគិរី ដែលអាច​អភិវឌ្ឍន៍​ជាតំបន់ប្រជុំជន​រណប ​ភ្ជាប់ជាមួយក្រុងសែនមនោរម្យ, ​តំបន់ប្រជុំជននៃស្រុកកោះញែក ដែលមានសក្តានុពល​ក្នុង​ការរៀបចំអភិវឌ្ឍន៍​ជាមណ្ឌលទេសចរណ៍នាពេលអនាគត​ តំបន់អភិរក្សនៃដែនជម្រកសត្វព្រៃ, និង​តំបន់ទេសចរណ៍សមាហរណតាមច្រកព្រំដែន ៕ អត្ថបទ៖ សុន រ៉ាឌី