អធិការបតីអាល្លឺម៉ង់ លោក Friedrich Merz បានជំរុញឱ្យទីក្រុងតេអេរ៉ង់ វិលត្រឡប់ទៅរកតុចរចាវិញ បន្ទាប់ពីត្រូវបានរាយការណ៍អំពីការវាយប្រហាររបស់អ៊ីរ៉ង់ទៅលើប្រទេសអារ៉ាប់រួម។

លោកបាននិយាយថា «ប្រទេសអារ៉ាប់រួម បានក្លាយជាគោលដៅនៃការវាយប្រហារដោយយានដ្រូន និងមីស៊ីលរបស់អ៊ីរ៉ង់ ជាថ្មីម្តងទៀត។ យើងថ្កោលទោសយ៉ាងខ្លាំង ចំពោះការវាយប្រហារទាំងនេះ។ សាមគ្គីភាពរបស់យើងគឺនៅជាមួយប្រជាជនអារ៉ាប់រួម និងដៃគូរបស់យើងនៅក្នុងតំបន់»។

លោក Merz បានជំរុញឱ្យអ៊ីរ៉ង់វិលត្រឡប់ទៅរកតុចរចាវិញ ហើយអ៊ីរ៉ង់ ត្រូវតែ «បញ្ឈប់ការយកពិភពលោក និងតំបន់ ធ្វើជាចំណាប់ខ្មាំង»។

លោក Merz បាននិយាយថា «ការបិទច្រកសមុទ្រ Hormuz ត្រូវតែបញ្ចប់ ហើយទីក្រុងតេអេរ៉ង់ មិនត្រូវផលិតអាវុធនុយក្លេអ៊ែរទេ និងមិនត្រូវគំរាមកំហែង ឬវាយប្រហារបន្ថែមទៀតទៅលើដៃគូរបស់យើងឡើយ»។