យោងតាមអាជ្ញាធរ និងសាក្សីបានឲ្យដឹងថា អាកាសយានដ្ឋានអន្តរជាតិ Khartoum និងទីតាំងយោធាពីរកន្លែង នៅក្នុងរដ្ឋធានីរបស់ប្រទេសស៊ូដង់ ត្រូវបានកំណត់គោលដៅវាយប្រហារដោយយានដ្រូនកាលពីថ្ងៃចន្ទ ដែលបង្កឱ្យមានការផ្ទុះ និងបញ្ជូនផ្សែងហុយចេញពីទីតាំងផ្សេងៗគ្នានៅទូទាំងទីក្រុង។

ការិយាល័យព័ត៌មាននៃក្រសួងវប្បធម៌និងព័ត៌មានស៊ូដង់ បាននិយាយនៅក្នុងសេចក្តីថ្លែងការណ៍ថា យានដ្រូនមួយគ្រឿងបានវាយប្រហារតំបន់មួយនៅខាងក្នុងអាកាសយានដ្ឋាន Khartoum ប៉ុន្តែបានបញ្ជាក់ថា ពុំមានរបាយការណ៍អំពីអ្នកស្លាប់ រងរបួស ឬការខូចខាតនោះទេ។ ការិយាល័យបាននិយាយបន្ថែមថា អាជ្ញាធរបានជម្លៀសបុគ្គលិកអាកាសយានដ្ឋាន ហើយបានសម្រេចបិទអាកាសយានដ្ឋានរយៈពេល៧២ម៉ោងជាវិធានការប្រុងប្រយ័ត្នជាមុន និងបាននិយាយថា ចរាចរណ៍ផ្លូវអាកាសនឹងបន្តឡើងវិញជាធម្មតា នៅពេលដែលនីតិវិធី ត្រូវបានបញ្ចប់។

សាក្សីនិយាយថា ការផ្ទុះបីលើកជាប់ៗគ្នាត្រូវបានគេឮនៅភាគខាងកើតទីក្រុង Khartoum បន្ទាប់មកមានផ្សែងក្រាស់ហុយចេញពីខាងក្នុងអាកាសយានដ្ឋាន ខណៈគ្រាប់ផ្លោងមួយចំនួនបានធ្លាក់ទៅលើតំបន់លំនៅឋាននៅក្បែរនោះ។ អាកាសយានដ្ឋាន Khartoum បានទទួលជើងហោះហើរពាណិជ្ជកម្មលើកដំបូងរបស់ខ្លួននៅថ្ងៃទី១ ខែកុម្ភៈ បន្ទាប់ពីបើកដំណើរការឡើងវិញ ក្រោយការជួសជុល និងថែទាំដោយសារតែការបំផ្លាញធ្ងន់ធ្ងរពីសង្គ្រាម។ តំបន់ធំៗនៅប្រទេសស៊ូដង់ កំពុងមើលឃើញពីការកើនឡើងគួរឱ្យកត់សម្គាល់នៃការប្រើប្រាស់យានដ្រូនក្នុងប្រតិបត្តិការយោធា ក្នុងពេលមានការព្រមានអំពីផលប៉ះពាល់កាន់តែខ្លាំងរបស់វាទៅលើជនស៊ីវិល។