មន្ត្រីអឺរ៉ុប បាន និងកំពុងធ្វើការលើវិធី ដើម្បីបញ្ចុះបញ្ចូលប្រធានាធិបតីអាមេរិក លោក Donald Trump ឲ្យ រក្សាវត្តមានរបស់សហរដ្ឋអាមេរិក នៅក្នុងអង្គការណាតូ (NATO) ទោះបីជាមានភាពតានតឹងខ្លាំង ជុំវិញសង្គ្រាមអ៊ីរ៉ង់ក៏ដោយ។ ប៉ុន្តែចំណាត់ការភ្លាមៗរបស់លោក ក្នុងការកាត់បន្ថយកងកម្លាំងអាមេរិក នៅក្នុងប្រទេសអាល្លឺម៉ង់ គឺជាសញ្ញាចុងក្រោយបង្អស់ដែលបង្ហាញថា កិច្ចប្រឹងប្រែងបែបនេះ មិនគ្រប់គ្រាន់ និងនៅឆ្ងាយពីការទទួលបានជោគជ័យដោយជាក់ស្ដែង។

ខ្លឹមសារនៃការសម្រេចចិត្តដែលបានប្រកាសកាលពីថ្ងៃសុក្រចុងសប្ដាហ៍កន្លងមក ក្នុងការដកកងទ័ពចំនួន ៥.០០០នាក់ចេញពីអាល្លឺម៉ង់ មិនមែនជារឿងគួរឲ្យភ្ញាក់ផ្អើលឡើយ សម្រាប់មន្ត្រីអង្គការណាតូ។ មេដឹកនាំអឺរ៉ុប បានយល់ស្របជាមួយប្រធានាធិបតីអាមេរិកថា ប្រទេសអឺរ៉ុបនឹងទទួលខុសត្រូវបន្ថែមទៀតចំពោះសន្តិសុខផ្ទាល់ខ្លួនរបស់ពួកគេ ពីកងកម្លាំងអាមេរិក។

ការលុបចោលផែនការដាក់ពង្រាយមីស៊ីល Tomahawk រយៈចម្ងាយឆ្ងាយរបស់សហរដ្ឋអាមេរិក នៅអាល្លឺម៉ង់ គឺជាការព្រួយបារម្ភជាង សម្រាប់ទីក្រុងប៊ែរឡាំង។ ប៉ុន្តែសូម្បីតែរឿងនោះ ក៏មិនមែនជារឿងគួរឲ្យភ្ញាក់ផ្អើលដែរ ព្រោះកិច្ចព្រមព្រៀងនោះត្រូវបានធ្វើឡើងដោយអ្នកកាន់តំណែងមុនរបស់លោក Trump គឺលោក Joe Biden ហើយស្តុកមីស៊ីល Tomahawk របស់សហរដ្ឋអាមេរិក ត្រូវបានបំផ្លាញដោយសង្គ្រាម រវាងសហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់។

អ្វីដែលគួរឲ្យព្រួយបារម្ភ សម្រាប់រដ្ឋាភិបាលអឺរ៉ុប គឺរបៀបដែលចំណាត់ការនេះ ត្រូវបានធ្វើឡើង ដោយមានការជូនដំណឹងជាមុន ឬការពិគ្រោះយោបល់តិចតួច និងជាមួយមន្ត្រីអាមេរិក ដែលភ្ជាប់វាទៅនឹងការមិនពេញចិត្តរបស់លោក Trump ចំពោះការរិះគន់របស់អធិការបតីអាល្លឺម៉ង់ លោក Friedrich Merz ពាក់ព័ន្ធនឹងការប្រព្រឹត្តិរបស់សហរដ្ឋអាមេរិក ចំពោះសង្គ្រាមអ៊ីរ៉ង់។ លោកស្រី Siemtje Moeller សមាជិកសភាជាន់ខ្ពស់មកពីគណបក្សសង្គមប្រជាធិបតេយ្យរបស់អាល្លឺម៉ង់ ដែលជាផ្នែកមួយនៃរដ្ឋាភិបាលចម្រុះរបស់លោក Merz បាននិយាយថា «អ្វីដែលគួរឲ្យព្រួយបារម្ភមិនមែនជាតួលេខនៃកងទ័ព ៥.០០០នាក់នោះទេ ប៉ុន្តែជាសញ្ញានយោបាយពីទីក្រុងវ៉ាស៊ីនតោនថា ភាពជាដៃគូយូរអង្វែង និងគួរឲ្យទុកចិត្តទាំងស្រុង ហាក់ដូចជាលែងរាប់បញ្ចូលអ្វីទាំងអស់ ហើយហាក់ដូចជាស្ថិតនៅក្រោមការសម្រេចចិត្តតាមតែនឹកឃើញ»៕