ក្លិបយក្សអាល្លឺម៉ង់ Bayern Munich កំពុងឈានដល់ជំហានសំខាន់មួយក្នុងការប្រកួតអឺរ៉ុប ខណៈពួកគេនៅសល់តែមួយប្រកួតប៉ុណ្ណោះ ដើម្បីឈានទៅវគ្គផ្តាច់ព្រ័ត្រ UEFA Champions League។

គ្រូបង្វឹក Vincent Kompany បាននិយាយមុនការប្រកួតជើងទី២ វគ្គពាក់កណ្តាលផ្តាច់ព្រ័ត្រ ទល់នឹងក្លិបបារាំង Paris Saint-Germain ថា កីឡាករ និងអ្នកគាំទ្ររបស់ Bayern កំពុងត្រៀមខ្លួនសម្រាប់ពេលវេលាដ៏អស្ចារ្យមួយ។

ក្នុងការប្រកួតជើងទី១ PSG ដែលជាជើងឯកឆ្នាំមុន បានយកឈ្នះយ៉ាងតានតឹង ៥-៤ បន្ទាប់ពី Bayern តាមពីក្រោយ ៥-២។

 ទោះជាយ៉ាងណា Kompany បានបញ្ជាក់ថា ក្រុមរបស់គាត់មានទំនុកចិត្តខ្ពស់មុនការប្រកួតជើងទីពីរទោះកំពុងតាមពីក្រោយមួយគ្រាប់ក៏ដោយ។

Kompany បាននិយាយថា៖ “ខ្ញុំមានអារម្មណ៍មួយថា ពួកយើងនឹងបន្តជំហានបន្ទាប់ជាមួយគ្នា។ នៅដើមរដូវកាល មានមនុស្សតិចណាស់ជឿថា យើងអាចមានឱកាសដល់កម្រិតនេះ។ ប៉ុន្តែឥឡូវនេះ យើងនៅទីនេះ ហើយអ្នកគាំទ្រជឿជាក់លើយើង ដើម្បីធ្វើឲ្យពេលវេលានេះក្លាយជាអ្វីដែលមិនអាចភ្លេចបាន”។

នៅក្រោមការដឹកនាំរដូវកាលទី២របស់ Kompany គេឃើញ Bayern Munich ឈ្នះពាន Bundesliga រួចរាល់ ហើយកំពុងមានឱកាសឈ្នះពានក្នុងស្រុកមួយទៀត ប្រសិនបើពួកគេអាចយកឈ្នះ Stuttgart ក្នុងវគ្គផ្តាច់ព្រ័ត្រ German Cup នៅថ្ងៃទី ២៣ ខែឧសភា៕ អត្ថបទ៖នាង សុភាវុធ