យោងតាមប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអង្គារ ទី៥ ខែឧសភាថា ការផ្ទុះនៅរោងចក្រផលិតកាំជ្រួចមួយកន្លែងក្នុងប្រទេសចិន បានបណ្តាលឲ្យមនុស្សយ៉ាងហោចណាស់ ២៦នាក់ស្លាប់ និងរងរបួស ៦១ នាក់ ដែលធ្វើឱ្យអគារបាក់បែក និងបញ្ជូនផ្សែងហុយឡើងទៅលើអាកាស និងបានជំរុញឱ្យប្រធានាធិបតី លោក ស៊ី ជីនពីង បញ្ជាឱ្យមានការស៊ើបអង្កេតហ្មត់ចត់។

ប្រជាជននៅថ្ងៃពុធ ទី៦ ខែឧសភានេះ ត្រូវបានគេមើលឃើញកំពុងជួសជុលអគារដែលខូចខាត ខណៈ កញ្ចក់បែកខ្ទេចខ្ទីរាយប៉ាយនៅលើដងផ្លូវដោយសារតែរលកនៃការផ្ទុះ។ 

ផ្សែងត្រូវបានគេមើលឃើញហុយឡើងបន្ទាប់ពីការផ្ទុះដែលបានកើតឡើងកាលពីថ្ងៃចន្ទ ទី៤ ខែឧសភា នៅបរិវេណរោងចក្រក្នុងក្រុង Liuyang ជាទីរួមខេត្ត Hunan ភាគកណ្តាល ដែលគេស្គាល់ថាជារដ្ឋធានីកាំជ្រួចរបស់ប្រទេសចិន។

អាជ្ញាធរបានជម្លៀសប្រជាជនចេញពីតំបន់ជុំវិញនោះដោយសារតែហានិភ័យពីម្សៅខ្មៅងាយភ្លើងឆាបឆេះ ដែលរក្សាទុកនៅក្នុងឃ្លាំងចំនួនពីរកន្លែងនៅក្នុងបរិវេណនោះ។

មិនចម្លែកចំពោះគ្រោះថ្នាក់កាំជ្រួចនិងផ្នែកឧស្សាហកម្មនេះនៅប្រទេសចិន នោះទេ។ កាលពីខែមិថុនា ឆ្នាំមុន ការផ្ទុះនៅរោងចក្រផលិតកាំជ្រួចមួយកន្លែងក្នុងខេត្ត Hunan ក៏បានសម្លាប់មនុស្ស ៩ នាក់ និងរបួស ២៦ នាក់។