នាថ្ងៃពុធ (ទី៦ ខែឧសភា ឆ្នាំ២០២៦) នេះ ប្រទេសហ្វីលីពីនបានអំពាវនាវដល់សហភាពមីយ៉ាន់ម៉ាឲ្យព្រមឲ្យបេសកជនពិសេសរបស់អាស៊ាន (ASEAN) ជួបជាមួយមេដឹកនាំដែលត្រូវបានឃុំខ្លួន គឺលោកស្រី អ៊ុងសាន ស៊ូជី (Aung San Suu Kyi) ដោយជំរុញឲ្យមានតម្លាភាពកាន់តែខ្លាំង បន្ទាប់ពីអាជ្ញាធរអនុញ្ញាតឲ្យលោកស្រីត្រូវឃុំខ្លួនក្នុងផ្ទះ សម្រាប់រយៈពេលជាប់ពន្ធនាគារនៅសល់។

ហ្វីលីពីន ដែលជាប្រធានអាស៊ាននៅឆ្នាំនេះ បានលើកឡើងនៅក្នុងសេចក្តីថ្លែងការណ៍មួយថា៖ «យើងចាត់ទុកការវិវត្តទាំងនេះ ជាជំហានដ៏សំខាន់ក្នុងវិធានការកសាងទំនុកចិត្តដែលចាំបាច់ជាបន្តបន្ទាប់ ដើម្បីឲ្យមានស្ថិរភាពជាតិរយៈពេលវែង នៅសហភាពមីយ៉ាន់ម៉ា»។

ក្រសួងការបរទេសហ្វីលីពីនបានលើកឡើងថា មីយ៉ាន់ម៉ាគួរតែអនុញ្ញាតឲ្យលោកស្រី អ៊ុងសាន ស៊ូជី មានទំនាក់ទំនងជាមួយក្រុមគ្រួសាររបស់លោកស្រី ដើម្បី «បង្ហាញពីការប្តេជ្ញាចិត្តពិតប្រាកដ ចំពោះការផ្សះផ្សាជាតិ»។

ក្រសួងបានបន្ថែមថា ការអនុញ្ញាតដល់បេសកជនពិសេសរបស់អាស៊ាន នឹងគាំទ្រដល់ការចូលរួមជាមួយភាគីពាក់ព័ន្ធទាំងអស់ និងជំរុញការសន្ទនាជាតិប្រកបដោយបរិយាបន្ន។ ហ្វីលីពីនក៏បានលើកឡើងផងដែរថា ការវិវត្តទាំងនេះ គួរតែត្រូវបានប្រើប្រាស់ ដើម្បីកសាងសន្ទុះ សម្រាប់ការសន្ទនានយោបាយ និងការផ្សះផ្សាជាតិ នៅក្នុងប្រទេសមីយ៉ាន់ម៉ា ក្រោមក្របខ័ណ្ឌសន្តិភាពអាស៊ាន ដែលគេស្គាល់ថា ជាការឯកភាព ៥ចំណុច។

គួរបញ្ជាក់ថា លោកស្រី អ៊ុងសាន ស៊ូជី ត្រូវបានឃុំខ្លួន ចាប់តាំងពីរដ្ឋាភិបាលជាប់ឆ្នោតរបស់លោកស្រី ត្រូវបានទម្លាក់ពីអំណាច នៅក្នុងរដ្ឋប្រហារឆ្នាំ២០២១។ លោកស្រីបាន និងកំពុងអនុវត្តទោសជាប់ពន្ធនាគាររយៈពេល ២៧ឆ្នាំ បន្ទាប់ពីត្រូវបានកាត់ទោសពីបទល្មើសព្រហ្មទណ្ឌជាច្រើនករណី ដោយផ្អែកលើការចោទប្រកាន់ដែលសម្ព័ន្ធមិត្តរបស់លោកស្រី បានលើកឡើងថា មានហេតុផលនយោបាយ៕