រដ្ឋមន្ត្រីការបរទេសអាមេរិក លោក Marco Rubio បានប្រាប់អ្នកសារព័ត៌មាន កាលពីថ្ងៃអង្គារ (ទី៥ ខែឧសភា ឆ្នាំ២០២៦) ថា នាវិកស៊ីវិលយ៉ាងហោចណាសចំនួន ១០នាក់ បានបាត់បង់ជីវិត ដោយសារតែជម្លោះដែលកំពុងបន្តកើតមាន នៅច្រកសមុទ្រ Hormuz។

អំឡុងពេលនិយាយនៅឯសេតវិមាន លោក Rubio បានប្រាប់ថា សហរដ្ឋអាមេរិក នឹងបន្តដាក់ពង្រាយធនធានរបស់ខ្លួន ដើម្បីការពារសេរីភាពនៃការធ្វើនាវាចរណ៍ នៅក្នុងផ្លូវសំខាន់នេះ។ ដោយមិនផ្តល់ព័ត៌មានលម្អិតបន្ថែម លោក Rubio បានបញ្ជាក់ថា៖ «ពួកគេត្រូវដាច់ទំនាក់ទំនងពីអ្នកដទៃ ពួកគេឃ្លាន ពួកគេងាយរងគ្រោះ ហើយយ៉ាងហោចណាស់នាវិកចំនួន ១០នាក់ បានបាត់បង់ជីវិត។ ពួកគេសុទ្ធតែជានាវិកស៊ីវិល»។

ជាមួយគ្នានេះ លោក Rubio បានទទូចថា សហរដ្ឋអាមេរិកកំពុងចាត់វិធានការការពារខ្លួន ក្នុងការអនុវត្តការបិទខ្ទប់ផ្លូវ ចំពោះកំពង់ផែអ៊ីរ៉ង់។ លោកបានប្រាប់សន្និសីទសារព័ត៌មានថា៖ «ប្រតិបត្តិការយោធាដំបូងប្រឆាំងនឹងអ៊ីរ៉ង់បានចប់ហើយ។ យើងនឹងឆ្លើយតបលុះត្រាតែមានការវាយប្រហារជាមុន។ នេះគឺជាប្រតិបត្តិការការពារខ្លួន»។

គួរបញ្ជាក់ថា មុនពេលសហរដ្ឋអាមេរិក និងអ៊ីស្រាអែលវាយប្រហារអ៊ីរ៉ង់កាលពីថ្ងៃទី២៨ ខែកុម្ភៈ ការផ្គត់ផ្គង់ប្រេងសកលប្រហែល ២០ភាគរយបានឆ្លងកាត់ច្រកសមុទ្រនេះជារៀងរាល់ថ្ងៃ។ លោក Rubio បាននិយាយថា វាដល់ពេលហើយ ដែលទីក្រុងតេអេរ៉ង់ ត្រូវ «ទទួលយកការពិតនៃស្ថានភាព» ដោយបន្ថែមថា បេសកជនអាមេរិក លោក Steve Witkoff និងលោក Jared Kushner កំពុងបន្តស្វែងរកដំណោះស្រាយការទូត៕