​អ៊ុយ​ក្រែ​ន៖ ប្រទេស​អ៊ុយ​ក្រែ​ន​លើក​ឡើង​ថា ខ្លួន​រំពឹង​ថា រុស្ស៊ី​នឹង​បើក​ការវាយប្រហារ​ថ្មី​ទ្រង់ទ្រាយ​ធំ​ក្នុង​ពេល​ឆាប់ៗ​នេះ​ក្នុង​ភាគ​ខាងកើត​របស់​ប្រទេស​នេះ ខណៈ​មេដឹកនាំ​អូទ្រីស​បាន​និយាយ​ថា លោក​មាន​ទុទ្ទិដ្ឋិនិយម​អំពី​ការ​បញ្ចប់​សង្គ្រាម​ បន្ទាប់ពី​លោក​ជួប​ជាមួយ​លោក​ប្រធានាធិបតី​រុស្ស៊ី Vladimir Putin​។

​បន្ទាប់ពី​ការ​ដក​កងកម្លាំង​ចេញពី​ភាគ​ខាងជើង​អ៊ុយ​ក្រែ​ន រួម​ទាំង​តំបន់​មួយ​ចំនួន​នៅ​ជាយ​រដ្ឋធានី Kyiv ដែល​រង​ការបំផ្លិច​បំផ្លាញ​នៅតែ​ស្ថិត​ក្រោម​ការ​គ្រប់គ្រង​របស់​ខ្លួន រុស្ស៊ី​និយាយ​ថា ​គោលដៅ​សំខាន់​របស់​ខ្លួន​គឺ​តំបន់​ភាគ​ខាងកើត​អ៊ុយ​ក្រែ​ន​។ ​រដ្ឋធានី Kyiv ត្រូវ​បាន​ទាមទារ​ឱ្យ​បោះបង់​ការ​គ្រប់​គ្រង​ទឹកដី​នៅ​ទីនោះ ដែល​ត្រូវ​បាន​គេ​ស្គាល់​ថា​ជា​តំបន់ Donbas ទៅ​ឱ្យ​ក្រុម​អ្នក​បំបែក​ខ្លួន​និយម​គាំទ្រ​រុស្ស៊ី​។ រដ្ឋធានី ​Kyiv និយាយ​ថា កងទ័ព​អ៊ុយ​ក្រែ​ន​របស់​ខ្លួន​កំពុង​ត្រៀម​សម្រាប់​សមរភូមិ​ថ្មី​។

​អ្នកនាំពាក្យ​ក្រសួងការពារជាតិ​អ៊ុយ​ក្រែ​ន​លោក Oleksandr Motuzyanyk បាន​និយាយ​ថា យើង​ព្យាករណ៍​ថា​ ការ​ប្រយុទ្ធ​ដ៏​សកម្ម​នឹង​ចាប់ផ្ដើម​នៅ​ក្នុង​តំបន់​ទាំងនេះ​ក្នុង​ពេល​ដ៏​ខ្លី​បំផុត​ខាងមុខ។​ ​មន្ត្រី​សហរដ្ឋអាមេរិក​មួយ​រូប​បាន​និយាយ​ថា ទីក្រុង Washington ជឿ​ថា រុស្ស៊ី​កំពុង​ព្យាយាម​ពង្រឹង​ប្រមូល​កម្លាំង និង​ផ្គត់ផ្គង់​កងទ័ព​របស់​ខ្លួន​ឡើងវិញ​នៅ​ក្នុង​តំបន់ Donbas៕

អត្ថបទ៖ សុខមាន