រដ្ឋមន្ត្រីពាណិជ្ជកម្មនៃក្រុមប្រទេសមានឧស្សាហកម្មលូតលាស់ទាំង៧ (G7) ដែលជួបប្រជុំគ្នានៅទីក្រុងប៉ារីស ប្រទេសបារាំង នាថ្ងៃពុធ (ទី៦ ខែឧសភា ឆ្នាំ២០២៦) នេះ បានស្វែងរកមូលដ្ឋានរួមមួយ ជុំវិញការធានាការផ្គត់ផ្គង់រ៉ែសំខាន់ៗ ដែលត្រូវបានក្ដោបក្ដាប់ដោយប្រទេសចិន ប៉ុន្តែការគំរាមដំឡើងពន្ធគយថ្មីរបស់សហរដ្ឋអាមេរិក លើរថយន្តដែលផលិតនៅសហភាពអឺរ៉ុប (EU) បានប៉ះពាល់ការមានឯកភាព។

ប្រទេសបារាំងចង់ឲ្យការផ្គត់ផ្គង់រ៉ែសំខាន់ៗ ជាលទ្ធផលជាក់ស្តែងបំផុត ក្នុងអំឡុងពេលធ្វើជាប្រធាន G7 ខណៈដែលរដ្ឋមន្ត្រីរៀបចំ សម្រាប់កិច្ចប្រជុំកំពូលរបស់មេដឹកនាំ នៅពាក់កណ្តាលខែមិថុនា។ នេះបើយោងតាមរដ្ឋមន្ត្រីពាណិជ្ជកម្មបរទេស លោក Nicolas Forissier ដែលបាននិយាយនៅពេលលោកទៅដល់ សម្រាប់កិច្ចពិភាក្សានេះ។

លោកបានបញ្ជាក់ថា៖ «ខ្ញុំជឿថា យើងនឹងសម្រេចបានវឌ្ឍនភាពជាក់ស្តែង ពាក់ព័ន្ធនឹងរ៉ែកម្រ និងរ៉ែសំខាន់ៗ ដោយធានាបាននូវខ្សែច្រវាក់ផ្គត់ផ្គង់របស់យើង និងធានាថា យើងមិនក្លាយជាចំណាប់ខ្មាំងរបស់ប្រទេសមួយចំនួនឡើយ»។

មន្ត្រីដែលចូលរួមក្នុងការពិភាក្សា បានលើកឡើងថា មានកិច្ចព្រមព្រៀងយ៉ាងទូលំទូលាយ ស្ដីពីតម្រូវការក្នុងការកាត់បន្ថយការពឹងផ្អែកលើប្រទេសចិន ប៉ុន្តែការខ្វែងគំនិតសំខាន់ៗ នៅតែមានដដែល អំពីរបៀបដែលធ្វើដូច្នេះ។

ជាមួយគ្នានេះ ឯកភាពរបស់ G7 ក៏កំពុងត្រូវបានសាកល្បងផងដែរ ដោយការអត្ថាធិប្បាយពីសំណាក់ប្រធានាធិបតីអាមេរិក លោក Donald Trump ដែលបាននិយាយថា ទីក្រុងវ៉ាស៊ីនតោននឹងដំឡើងពន្ធលើរថយន្តផលិតនៅ EU ដល់ ២៥ភាគរយ ដោយឡើងពីកម្រិត ១៥ភាគរយ ដោយអះអាងថា ទីក្រុងប្រ៊ុចសែល មិនបានគោរពតាមកិច្ចព្រមព្រៀងពាណិជ្ជកម្មដែលត្រូវបានព្រមព្រៀងគ្នា នៅទីក្រុង Turnberry ប្រទេសស្កុតឡែន កាលពីឆ្នាំមុន៕