តាមរយៈលិខិតបើកចំហរមួយ អតីតអ្នកការទូត រដ្ឋមន្ត្រី និងមន្ត្រីជាន់ខ្ពស់ចំនួនជាង ៤០០នាក់ នៅថ្ងៃពុធ (ទី៦ ខែឧសភា ឆ្នាំ២០២៦) នេះ បានជំរុញឲ្យសហភាពអឺរ៉ុប (EU) «ចាត់វិធានការឥឡូវនេះ» ប្រឆាំងនឹងការតាំងទីលំនៅ «ខុសច្បាប់» របស់អ៊ីស្រាអែល នៅក្នុងតំបន់កាន់កាប់ West Bank។

លិខិតនេះបានកើតឡើងនៅពេលដែលអ៊ីស្រាអែល មានបំណងបន្តទៅមុខជាមួយនឹងផែនការ E1 ជាគម្រោងសាងសង់ថ្មី ដែលគ្របដណ្តប់លើផ្ទៃដីប្រហែល ១២គីឡូម៉ែត្រការ៉េ ដោយមានលំនៅឋានប្រមាណជា ៣.៤០០ខ្នង នៅក្នុងតំបន់កាន់កាប់ West Bank។

ចំណាត់ការនេះនឹងបំបែកបន្ថែមទៀត ចេញពីតំបន់ West Bank ចំពោះភាគខាងកើតនៃទីក្រុង Jerusalem ដែលត្រូវបានកាន់កាប់ និងបញ្ចូលជាដែនដីឧបសម្ព័ន្ធដោយអ៊ីស្រាអែល និងមានប្រជាជនប៉ាឡេស្ទីនភាគច្រើនរស់នៅ។

លិខិតដែលចុះហត្ថលេខាដោយឥស្សរជនជាង ៤៤០នាក់ ក្នុងនោះរួមមានទាំងអតីតប្រធានគោលនយោបាយការបរទេសរបស់ EU លោក Josep Borrell និងអតីតនាយករដ្ឋមន្ត្រីបែលហ្ស៊ិក លោក Guy Verhofstadt ផងដែរនោះ បានរៀបរាប់ថា៖ «EU និងរដ្ឋជាសមាជិករបស់ប្លុក រួមជាមួយដៃគូ ត្រូវតែចាត់វិធានការជាបន្ទាន់ ដើម្បីរារាំងអ៊ីស្រាអែលកុំឲ្យបន្តការបញ្ចូលជាឧបសម្ព័ន្ធនៃដែនដីប៉ាឡេស្ទីន ដោយខុសច្បាប់ នៅក្នុងតំបន់ West Bank»។

អ្នកចុះហត្ថលេខាទាំងអស់ បានអំពាវនាវឲ្យមានទណ្ឌកម្មកំណត់គោលដៅ ដូចជាការហាមឃាត់ទិដ្ឋាការ និងការរឹតបន្តឹងលើអាជីវកម្ម ចំពោះ «អ្នកដែលពាក់ព័ន្ធនឹងសកម្មភាពតាំងទីលំនៅខុសច្បាប់ទាំងអស់» ដោយអំពាវនាវឲ្យមានវិធានការប្រឆាំងនឹងអ្នកដែលលើកកម្ពស់ ឬអនុវត្តគម្រោង E1 នេះ៕