បាល់ទាត់៖ លោក ប្រាក់ វុទ្ធី គ្រូបង្វឹកក្រុមបាល់ទាត់នារីជម្រើសជាតិកម្ពុជាបានចាត់ទុកពូល A សម្រាប់ប្រភេទបាល់ទាត់នារីនៃព្រឹត្តិការណ៍ស៊ីហ្គេមលើកទី៣១ នៅវៀតណាមគឺជាពូលមរណៈ ដ្បិតត្រូវជួបសុទ្ធតែជាក្រុមខ្លាំងប្រចាំតំបន់ ពិសេសម្ចាស់ផ្ទះវៀតណាម និងហ្វីលីពីនដែលជាបេក្ខភាព World Cup 2023 ។
ការគូសបញ្ជាក់បែបនេះ បន្ទាប់ពីក្រុមបាល់ទាត់នារីជម្រើសជាតិកម្ពុជាត្រូវបានចាប់ឆ្នោតចូលក្នុងពូល A ជាមួយក្រុមបាល់ទាត់នារីជម្រើសជាតិវៀតណាម ហ្វីលីពីន និងឥណ្ឌូនេស៊ីកាលពីថ្មីៗ ខណៈលោក ប្រាក់ វុទ្ធី មើលឃើញថា គូប្រជែងទាំង ៣ក្រុមសុទ្ធតែមានកម្រិតលើកម្ពុជា សូម្បីឥណ្ឌូនេស៊ីក៏លើបន្ដិចបន្ដួចដែរ។ អតីតគ្រូបង្វឹកក្រុមបឹងកេត និងអគ្គិសនីកម្ពុជារូបនេះបន្ដថា វានឹងក្លាយជាការប្រកួតដ៏តានតឹង សម្រាប់ក្រុមកីឡការិនីកម្ពុជាដែលមានបទពិសោធន៍តិចតួច ខណៈអ្នកខ្លះសឹងតែគ្មានបទពិសោធន៍លើឆាកអន្ដរជាតិ។ តែយ៉ាងណាលោកបានប្ដេជ្ញានឹងដឹកនាំក្រុមឲ្យអស់ពីសមត្ថភាព ហើយយកការប្រកួតស៊ីហ្គេមនៅវៀតណាមគឺជាការវាស់ស្ទង់សមត្ថភាពមួយ ដើម្បីត្រៀមដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា។
សូមបញ្ជាក់ថា តាមគម្រោងក្រុមបាល់ទាត់នារីជម្រើសជាតិកម្ពុជា គ្រោងធ្វើការប្រមូលផ្ដុំហ្វឹកហាត់ពីថ្ងៃទី២០ ខែមេសា ដល់ថ្ងៃទី០៥ ខែឧសភា មុនចេញដំណើរទៅវៀតណាមនាថ្ងៃទី០៦-ឧសភា ដើម្បីចូលរួមប្រកួតកីឡាស៊ីហ្គេម លើកទី៣១ ខណៈប្រកួតបើកឆាកពូល A ក្រុមបាល់ទាត់នារីកម្ពុជាត្រូវជួបហ្វីលីពីនមុនគេនាថ្ងៃទី០៩-ឧសភា មុនជួបឥណ្ឌូនេស៊ីនាថ្ងៃទី១១-ឧសភា និងចុងក្រោយជួបម្ចាស់ផ្ទះវៀតណាមនាថ្ងៃទី១៤ ខែឧសភា ឆ្នាំ២០២២។ រីឯពូល B នៃព្រឹត្តិការណ៍នេះគឺមាន ៤ក្រុមដូចគ្នារួមមានថៃ មីយ៉ាន់ម៉ា សិង្ហបុរី និងឡាវ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
