សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា នៅព្រឹកថ្ងៃទី០៧ ខែឧសភា ឆ្នាំ២០២៦នេះ អញ្ជើញជួបសំណេះសំណាលជាមួយសមាជិក សមាជិកាក្រុមប្រឹក្សាខេត្ត ក្រុង-ស្រុក ឃុំ-សង្កាត់ និងមន្ត្រីនៃមន្ទីរ-អង្គភាពនានាជុំវិញខេត្តតាកែវ ខណៈដែលនេះជាជំនួបទី៤ហើយ បន្ទាប់ពីជំនួបកន្លងទៅបានធ្វើនៅខេត្តកំពង់ចាម ខេត្តត្បូងឃ្មុំ និងខេត្តកំពង់ស្ពឺ។

ពិធីសំណេះសំណាលនេះ មានការអញ្ជើញចូលរួមពីសមាជិកព្រឹទ្ធសភា រដ្ឋសភា ប្រធាន អនុប្រធានក្រុមការងារថ្នាក់ជាតិចុះជួយខេត្តតាកែវ សមាជិកក្រុមប្រឹក្សាខេត្ត ក្រុង-ស្រុក ឃុំ-សង្កាត់ ព្រមទាំងថ្នាក់ដឹកនាំមន្ទីរ អង្គភាពនានាជុំវិញខេត្តតាកែវសរុប១២១៥នាក់។

ការចុះជួបសំណេះសំណាលតាមបណ្តាខេត្តនាពេលនេះ សម្តេចតេជោធ្លាប់បានបញ្ជាក់ថា គោលបំណងធំនៃការសម្រេចគោលដៅដែលសម្តេចបានដាក់ចេញ ពេលឡើងជាប្រធានព្រឹទ្ធសភា គឺការចូលរួមជាមួយរដ្ឋាភិបាលលើកិច្ចការការបរទេស នោះគឺការធ្វើការទូតសភា ខណៈដែលទាក់ទងកិច្ចការងារការបរទេសនេះ សកម្មភាពជំនួបរបស់សម្តេចទាំងក្នុងនិងក្រៅប្រទេស មានភាពសកម្មជាងមុន បើធៀបកាលសម្តេចធ្វើជានាយករដ្ឋមន្ត្រី និងទី២ ការធ្វើគណនេយ្យភាពជាមួយអង្គបោះឆ្នោត ដើម្បីឱ្យមានតម្លាភាព ក៏ដូចជាជំរុញឱ្យការងារមូលដ្ឋានកាន់តែមានប្រសិទ្ធភាព។

សូមបញ្ជាក់ថា ខេត្តតាកែវ គឺជាខេត្តមួយក្នុងចំណោមរាជធានី ខេត្តទាំង២៥ ស្ថិតនៅប៉ែកនិរតី នៃព្រះ រាជាណាចក្រកម្ពុជា មានចម្ងាយ ៧៧គីឡូម៉ែត្រ តាមផ្លូវជាតិលេខ២ ចម្ងាយ ៨៧គីឡូម៉ែត្រ តាមផ្លូវជាតិលេខ៣ ចម្ងាយ៧៥គីឡូម៉ែត្រ តាមផ្លូវដែកពីរាជធានីភ្នំពេញ មានអាកាសយានដ្ឋានអន្តរជាតិតេជោ ស្ថិតក្នុងស្រុកបាទី និងមានព្រែកជីកហ្វូណនតេជោឆ្លងកាត់ខេត្តតាកែវ ប្រវែង ៥៣គីឡូម៉ែត្រ។

ខេត្តតាកែវ មានព្រំប្រទល់ខាងជើង និងខាងកើតជាប់ខេត្តកណ្តាល ខាងលិចជាប់ខេត្តកំពង់ស្ពឺ និង ខេត្តកំពត និងខាងត្បូង ខាងកើតជាប់នឹងខេត្តអានយ៉ាង ប្រទេសវៀតណាម។ ស្ថានភាពផ្ទៃដីមានលក្ខណៈវាលទំនាប និងដីខ្ពស់ជាប់ជួរភ្នំ មានផ្ទៃដីធម្មជាតិសរុបចំនួន ៣.៦៨០,១៥គីឡូម៉ែត្រការ៉េ មាន១០ក្រុង-ស្រុក ១០០ឃុំ-សង្កាត់ និង១.១២១ភូមិ មានគ្រួសារចំនួន ២៤៣.៩៥០គ្រួសារ ប្រជាពលរដ្ឋសរុបចំនួន ១.១៧៥.១៥៩នាក់ ស្ត្រី ៦២២.២៦៨នាក់៕ អត្ថបទ： ពៅ រក្សា