ប៉េតង់៖ ការប្រកួតកីឡាប៊ូល និងប៉េតង់ប្រចាំសម្ព័ន្ធប៊ូល និងប៉េតង់មន្ទីរអប់រំ យុវជន និងកីឡាឆ្នាំ២០២២ បានបញ្ចប់ការប្រកួតជាផ្លូវការ បន្ទាប់ពីដំណើរការប្រកួតតាំងពីថ្ងៃទី១០ ខែមេសាកន្លងមកនេះ។ យោងតាមរយៈការបញ្ជាក់ថា ការប្រកួតនេះធ្វើឡើងក្នុងវិញ្ញាសាប្រកួត ៣នាក់ទល់នឹង ៣នាក់មិនកំណត់អាយុមាន ១៦ក្រុមចូលរួម និងវិញ្ញាសាយុវជន យុវនារីអាយុក្រោម ១៨ឆ្នាំ ៣នាក់ទល់នឹង ៣នាក់មាន ៦ក្រុមចូលរួមប្រកួត សរុបកីឡាករ-កីឡាការិនីចំនួន ៨៨នាក់។
លោក ប៊ុន បូរ៉ាន់ ប្រធានការិយាល័យកីឡានៃមន្ទីរអប់រំ យុវជន និងកីឡាខេត្តបាត់ដំបងលើកឡើងថា ការប្រកួតនេះសំដៅឱ្យក្រុមកីឡាករ-កីឡាការិនីនៅខេត្តបាត់ដំបងឱ្យមានឱកាសចូលរួមប្រកួតប្រជែង ចែករំលែកបទពិសោធន៍ ពង្រឹងកាយសម្បទាមាំមួន បង្កើនកម្លាំងបញ្ញាស្មារតី ឈ្លាសវៃ ពិសេសជាងនេះទៀតក្រុមដែលចូលរួមប្រកួតទាំងអស់ទទួលបាននូវបទពិសោធន៍ បច្ចេកទេស និងច្បាប់ប្រកួតកីឡាប៊ូល និងប៉េតង់ផងដែរ។ លោក យី សុងគី ប្រធានមន្ទីរអប់រំ យុវជន និងកីឡាបានកើតសរសើរដល់កីឡាករ-កីឡាការិនីទាំងអស់ដែលយកអស់កម្លាំងកាយចិត្តចូលរួមប្រកួត ក្នុងន័យធ្វើឱ្យកីឡាប៊ូល និងប៉េតង់ខេត្តបាត់ដំបងកាន់តែខ្លាំងជាលំដាប់។
ចំពោះលទ្ធផលនៃការប្រកួត វិញ្ញាសាយុវនារីអាយុក្រោម ១៨ឆ្នាំលេខ១ បានទៅក្លិបអប់រំកាយ និងកីឡា, លេខ២ បានទៅក្លិបហនុមានស្រុកសំឡូត និងលេខ៣ បានទៅលើក្រុមឥន្ទ្រីយ៍អប់រំស្រុកថ្មគោល។ វិញ្ញាសាយុវជនអាយុក្រោម ១៨ឆ្នាំលេខ១ ក្លិបអប់រំកាយ និងកីឡា និងលេខ២ ក្លិបឥន្ទ្រីយ៍អប់រំស្រុកថ្មគោល។ ដោយឡែកវិញ្ញាសាជាក្រុមបុរសមិនកំណត់អាយុ ក្លិបខ្លាសដណ្ដើមបានជើងឯក ចំណែកបក្សីស្លាបដែកជើងឯករង ខណៈឆ្មាប្រាក់សែនជ័យបញ្ចប់នៅចំណាត់ថ្នាក់លេខ៣៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
