ភ្នំពេញ៖ មណ្ឌលស្តារនីតិសម្បទា ព្យាបាលបន្សាបអ្នកញៀនគ្រឿងញៀន (DTA) បានចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការព្យាបាល ស្តារនីតិសម្បទា និងការផ្តាច់គ្រឿងញៀន, បច្ចុប្បន្ន (DTA) ក្លាយជាមណ្ឌលមានទំនុកចិត្តសម្រាប់អាណាព្យាបាល ក៏ដូចជនរងគ្រោះមកបន្សាប និងផ្តាច់អ្នកញៀនគ្រឿងញៀន។

លោក ហង្ស ជឿន ប្រធានមណ្ឌលស្តារនីតិសម្បទា ព្យាបាលបន្សាបអ្នកញៀនគ្រឿងញៀន (DTA) ថ្លែងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន ស្តីពីការព្យាបាល ស្តារនីតិសម្បទា និងការ​ផ្តាច់​គ្រឿងញៀន នៅថ្ងៃទី១១ ខែមេសា ឆ្នាំ២០២២ នេះថា DTA គឺជាមណ្ឌលមួយបានបើក​ដំណើរ​ស្តារនីតិសម្បទា និងព្យាបាលបន្សាបអ្នកញៀនគ្រឿងញៀន ​អស់រយៈពេលជាង ១០ឆ្នាំមកហើយ និងបាន​ប្រព្រឹត្តិ​ទៅដោយរលូន ។ចំណែកនៅក្នុងវិបត្តិនៃការរីករាលដាលជម្ងឺកូវីដ ១៩ បានផ្ទុះឡើង អ្នកមកសម្រាកព្យាបាល ​និងបន្សាបគ្រឿងញៀន​ បានធ្លាក់ចុះ​បន្តិចបន្តួច ដោយ​សារកា​រឹតត្បិត​នៃការបិទខ្ទប់ជាដើម,តែបន្ទាប់ពីវិបត្តិកូវីដ ១៩ បានធូរស្រាល ចំនួនអ្នកមកព្យាបាលនៅមណ្ឌល បាន​កើនឡើងវិញជាបណ្តើរៗ ក្នុងនោះមណ្ឌល​ក៏បាន​យកចិត្តទុកយ៉ាងខ្លាំង ​និងបានស្វែងរក​វិធីសាស្រ្ត​នៃការព្យាបាលនូវគ្រប់នីតិវិធី, ដែលមកបច្ចុប្បន្ន មណ្ឌល DTA បានក្លាយ​ជា​ទីទំនុកចិត្ត​សម្រាប់អាណាព្យាបាល ក៏ដូចជនគ្រោះដោយសារគ្រឿង ​ក្នុងការសម្រាកព្យាបាល ការផ្តាច់​គ្រឿងញៀន ​និងស្តារនីតិសម្បទាឡើងវិញផងដែរ។

ជុំវិញការព្យាបាល,លោកទន្ឌបណ្ឌិត ហង្ស អមរិន្ទ្រ ជាគ្រូពេទ្យប្រចាំនៅមណ្ឌលស្តារនីតិសម្បទា ព្យាបាល​បន្សាបអ្នកញៀនគ្រឿងញៀន ​លើកឡើងថា ពាក់ព័ន្ធការព្យាបាល​ដែល​បាន​អនុវត្ត​ជាប្រចំា​នៅ​ក្នុងមណ្ឌល (DTA) ក្នុងនោះចំពោះជនរងគ្រោះដែលមកថ្មី ​យើងបានពិនិត្យស្ថានភាពទូទៅ ទាំង​សន្តិ​អារម្មណ៍​ និង​ជំងឺ​ផ្លូវកាយ ​ប្រសិនការពិនិត្យឃើញស្ថានភាព​ជំងឺ​បែប​ណាមួយ មណ្ឌល​នឹង​ព្យាបាលទៅតាមរោគសញ្ញានៃអាការៈជំងឺនោះ។

ចំពោះបញ្ហានេះ លោកទន្ឌបណ្ឌិត ​បានអំពាវនាវដល់អាណាព្យាបាល ប្រសិនឃើញ​អាការៈជនរង​គ្រោះមិនស្រួល​ គួរស្រូត​យក​មកព្យាបាលឲ្យបានទាន់ពេលវេលា ដើម្បីជម្រុញ​ការព្យាបាល​ឆាប់​ជាសះស្បើយ។

សូមបញ្ជាក់ថា៖ ពាក់ព័ន្ធករណីជនល្មើសគ្រឿងញៀន បើតាមរបាយការណ៍អាជ្ញាធរ​ជាតិ​ប្រឆាំង​គ្រឿងញៀន ​សម្រាប់ជនពាក់ព័ន្ធគ្រឿងញៀនក្នុងឆ្នាំ ​២០២១ ​សរុបមានជាង ​១៣ ០០០នាក់ ក្នុងនោះ​មានជនបរទេសចំនួន ៣៦២ នាក់ រួមមាន ១៣ សញ្ជាតិ ដែលពាក់ព័ន្ធ​នឹង​សកម្មភាព​ជួញដូររក្សាទុក កែច្នៃ និងចាត់ចែងគ្រឿងញៀន៕ អត្ថបទ៖ សុន រ៉ាឌី