គណៈប្រតិភូសមាជិកព្រឹទ្ធសភាអាមេរិកមួយក្រុមដែលកំពុងធ្វើទស្សនកិច្ច នៅទីក្រុងប៉េកាំង បានអំពាវនាវឲ្យមានស្ថិរភាព និងកិច្ចសហប្រតិបត្តិការដោយសន្តិវិធី រវាងប្រទេសដែលមានសេដ្ឋកិច្ចធំជាងគេបំផុតទាំង២ របស់ពិភពលោក ដោយការជួបគ្នានេះ កើតមានឡើង ១សប្តាហ៍ មុនមានជំនួបកំពូល រវាងមេដឹកនាំនៃប្រទេសទាំង២។

នៅក្នុងសុន្ទរកថាបើកកិច្ចប្រជុំជាមួយរដ្ឋមន្ត្រីការបរទេសចិន លោក Wang Yi សមាជិកព្រឹទ្ធសភា លោក Steve Daines ដែលកំពុងដឹកនាំគណៈប្រតិភូនៃគណបក្សទាំង២ បានលើកឡើងថា៖ «ខ្ញុំជឿជាក់យ៉ាងមុតមាំថា យើងចង់បន្ធូរបន្ថយភាពតានតឹង មិនមែនផ្ដាច់ទំនាក់ទំនងនោះទេ។ យើងចង់បានស្ថិរភាព ហើយយើងចង់បានការគោរពគ្នាទៅវិញទៅមក»។

គួរបញ្ជាក់ថា ប្រធានាធិបតីអាមេរិក លោក Donald Trump គ្រោងនឹងធ្វើដំណើរទៅកាន់រដ្ឋធានីរបស់ប្រទេសចិន ដើម្បីជួបជាមួយសមភាគីរបស់លោក គឺលោក ស៊ី ជីនពីង (Xi Jinping) នៅថ្ងៃទី១៤ និង១៥ ខែឧសភា ឆ្នាំ២០២៦ នេះ។

ហើយសមាជិកព្រឹទ្ធសភាគណក្សសាធារណរដ្ឋរូបនេះ បានបញ្ជាក់ថា លោកសង្ឃឹមថា ជំនួបកំពូលរបស់មេដឹកនាំទាំង២ នឹងនាំឲ្យមានការបញ្ជាទិញយន្តហោះរបស់ក្រុមហ៊ុន Boeing ទោះបីជាលោកបានព្រមានថា ប្រទេសទាំង២ ប្រឈមនឹងបញ្ហាពាណិជ្ជកម្មក៏ដោយ។

បើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយ បានឲ្យដឹងថា លោក Daines បាននិយាយថា៖ «វាមានរយៈពេលប្រហែល ៩ឆ្នាំមកហើយ ចាប់តាំងពីមានការទិញយន្តហោះរបស់ក្រុមហ៊ុន Boeing នៅទីនេះ»៕