ភ្នំពេញ៖ បន្ទាប់ពីផ្អាកដំណើរការមួយរយៈពេល នៅថ្ងៃទី១២ មេសា ឆ្នាំ២០២២នេះ ស្ថានីយរថភ្លើង Royal Railway Cambodia បានបើកឲ្យដំណើរការឡើងវិញ ដើម្បីបម្រើឲ្យការដឹកជញ្ជូនអ្នកដំណើរ ពីក្រុងភ្នំពេញ ទៅកាន់ខេត្តចំនួន៦ រួមមាន៖ ខេត្តតាកែវ ពោធិ៍សាត់ បាត់ដំបង កំពត កែប និងខេត្តព្រះសីហនុ។

ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី កញ្ញា សក់ វណ្ណនី អ្នកគ្រប់គ្រងខ្សែអ្នកដំណើរ នៃ Royal Railway បានឲ្យដឹងថា ការបើកឲ្យដំណើរការផ្លូវដែក​ឡើងវិញ​នាពេលនេះ ​ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ក៏ដូចជាដើម្បីអបអរសាទរ​ពិធីបុណ្យ​ចូលឆ្នាំប្រពៃណីជាតិខ្មែរដែលនឹងឈានមកដល់នាពេលខាងមុខ។

កញ្ញា បានឲ្យដឹងទៀតថា ​មកដល់ពេលនេះ​ មានប្រជាពលរដ្ឋជាច្រើន ​កក់សំបុត្រទុកជាបន្តបន្ទាប់ ដើម្បីចាក​ចេញ​ទៅបណ្តាខេត្តនានា​ ដើម្បីធ្វើដំណើរកម្សាន្ត និងទៅស្រុកកំណើតជាដើម។

កញ្ញា បានឲ្យដឹងទៀតថា ​ការបើកឲ្យដំណើរការឡើងវិញ​ក្នុងពេលនេះ ការចេញដំណើរ​ទៅកាន់​ខេត្តទាំង៦ ​មានតែមួយជើងប៉ុណ្ណោះក្នុងពេលព្រឹក ​គឺម៉ោង៦កន្លះ សម្រាប់ការចេញដំណើរ​ទៅ​កាន់ខេត្តតាកែវ ពោធិ៍សាត់ បាត់ដំបង និង៧ព្រឹក ទៅកាន់ កំពត កែប និងព្រះសីហនុ។

ទាក់ទងនឹងតម្លៃសំបុត្រ​ អ្នកគ្រប់គ្រងរូបនេះ ​បានលើកឡើងថា​ មិនមានការតម្លើងថ្លៃទេ ទោះបីជា​ក្នុងឱកាសបុណ្យទានឬថ្ងៃចុងសប្តាហ៍ក៏ដោយ ​ដោយពីភ្នំពេញទៅកាន់ខេត្តតាកែវ​ តម្លៃសំបុត្រ ២ម៉ឺន ៤ពាន់រៀល ឬ ៦ដុល្លារ, ពោធិ៍សាត់ ២ម៉ឺន ៨ពាន់រៀល ឬ ៧ដុល្លារ, ​បាត់ដំបង ៣ម៉ឺន ២ពាន់រៀល ​ឬ៨ដុល្លារ, កំពត និងកែប​តម្លែដូចគ្នា​ គឺ ៣ម៉ឺន​ ៦ពាន់រៀល ឬ៩ដុល្លារ និង​ខេត្តព្រះសីហនុតម្លៃ ៤ម៉ឺនរៀល ឬ ១០ដុល្លារ សម្រាប់​មនុស្សម្នាក់ៗ៕អត្ថបទ៖ ឈិត បូរ៉ាវី