អង្គការគ្រូពេទ្យគ្មានព្រំដែន នៅថ្ងៃព្រហស្បតិ៍ (ទី៧ ខែឧសភា ឆ្នាំ២០២៦) នេះ បានចោទប្រកាន់អ៊ីស្រាអែលថា បានរឹតបន្តឹងដោយចេតនា ចំពោះចំណីអាហារ និងជំនួយ នៅក្នុងតំបន់ហ្កាហ្សា ដោយបង្កើតឲ្យមាន «វិបត្តិកង្វះអាហារូបត្ថម្ភ» ដែលផ្ដល់ផលប៉ះពាល់យ៉ាងធ្ងន់ធ្ងរជាពិសេសទៅលើទារក និងស្ត្រីមានផ្ទៃពោះ និងស្ត្រីបំបៅដោះកូន។

របាយការណ៍របស់អង្គការនេះ ក៏បានពិនិត្យមើលផងដែរលើអ្វីដែលខ្លួនលើកឡើងថា ជាគ្រោះថ្នាក់ដែលបង្កឡើងដោយអង្គការឯកជនគាំទ្រដោយសហរដ្ឋអាមេរិក និងអ៊ីស្រាអែល ដែលបង្កើតឡើងក្នុងឆ្នាំ២០២៥ ដើម្បីជំនួសការចែកចាយជំនួយរបស់អង្គការសហប្រជាជាតិ (UN) នៅក្នុងតំបន់ហ្កាហ្សា។

អង្គការផ្នែកវេជ្ជសាស្ត្រមួយនេះ ដែលត្រូវបានគេស្គាល់ដោយអក្សរកាត់ជាភាសាបារាំង MSF ផ្អែកលើការវិភាគស្ថានភាពរបស់ខ្លួន រវាងចុងឆ្នាំ២០២៤ និងដើមឆ្នាំ២០២៦ នៅតាមមណ្ឌលសុខភាពចំនួន ៤ ដែលខ្លួនគាំទ្រនៅក្នុងតំបន់ហ្កាហ្សា។

អង្គការនេះ បានឲ្យដឹងទៀតថា ការវិភាគនោះបានបង្ហាញពីកម្រិតខ្ពស់នៃការកើតមិនគ្រប់ខែ និងអត្រាមរណភាព ក្នុងចំណោមទារកដែលសម្រាលពីម្តាយដែលខ្វះអាហារូបត្ថម្ភ និងការកើនឡើងនូវការរលូត។ អង្គការ MSF បានភ្ជាប់លទ្ធផលទាំងនេះជាមួយនឹងការបិទខ្ទប់ទំនិញសំខាន់ៗដោយអ៊ីស្រាអែល និងការវាយប្រហារលើហេដ្ឋារចនាសម្ព័ន្ធស៊ីវិល ក្នុងនោះមានរួមទាំងមណ្ឌលសុខភាពផងដែរ។

អង្គការសប្បុរសធម៌នេះបានសង្កត់ធ្ងន់នៅក្នុងសេចក្តីថ្លែងការណ៍របស់ខ្លួនថា៖ «ភាពអសន្តិសុខ ការបម្លាស់ទីលំនៅ ការរឹតបន្តឹងលើជំនួយ ហើយការទទួលបានអាហារ និងការថែទាំសុខភាពមិនគ្រប់គ្រាន់ បានបង្កផលវិបាកយ៉ាងធ្ងន់ធ្ងរដល់សុខភាពមាតា និងទារកទើបនឹងកើត»។

ស្ថាប័ននេះបានព្រមានថា ស្ថានភាពនៅតែ «ផុយស្រួយខ្លាំង» ទោះបីជាមានបទឈប់បាញ់ ចាប់តាំងពីខែតុលា ឆ្នាំ២០២៥ បន្ទាប់ពីមានជម្លោះដ៏បំផ្លិចបំផ្លាញអស់រយៈពេល ២ឆ្នាំ៕