ប្រទេសទួរគី កាលពីថ្ងៃពុធ ទី៦ ខែឧសភា បានបង្ហាញគំរូមីស៊ីលបាលីស្ទីកអន្តរទ្វីបនៅក្នុងពិព័រណ៍ឧស្សាហកម្មការពារជាតិ ក្នុងទីក្រុងអ៊ីស្តង់ប៊ុល ក្នុងពេលមានជម្លោះក្នុងតំបន់កាន់តែខ្លាំងឡើង។

យោងតាមក្រសួងបានឲ្យដឹងថា មីស៊ីលប្រភេទនេះនឹងមានចម្ងាយបាញ់រហូតដល់ ៦.០០០គីឡូម៉ែត្រ ហើយនឹងអាចផ្ទុកក្បាលគ្រាប់ទម្ងន់៣.០០០គីឡូក្រាម។ ពុំមានព័ត៌មានលម្អិតបន្ថែមអំពីថាតើពេលណាដែលមីស៊ីលដំបូងនឹងត្រូវបានផលិត ឬពេលណាដែលការធ្វើតេស្តលើកដំបូង នឹងត្រូវបានធ្វើឡើង។

ដោយឡែក ក្រុមហ៊ុនផលិតយានដ្រូន Baykar បានបង្ហាញយានដ្រូន kamikaze ថ្មីចំនួនបីប្រភេទរបស់ខ្លួន ដែលប្រធាន លោក Selcuk Bayraktar បាននិយាយថា នឹងធ្វើការរួមគ្នាដើម្បីជំរុញការផលិតក្នុងចំនួនដ៏ច្រើន ដើម្បីយកឈ្នះលើប្រព័ន្ធការពារដែនអាកាស។

លោក Ahmet Akyol នាយកប្រតិបត្តិក្រុមហ៊ុន Aselsan បានប្រាប់សារព័ត៌មាន Reuters ក្នុងបទសម្ភាសន៍មួយថា ក្រុមហ៊ុនការពារជាតិនឹងផ្គត់ផ្គង់គ្រឿងបង្គុំចំនួន១៥០ប្រភេទនៃប្រព័ន្ធការពារដែនអាកាស Steel Dome របស់ប្រទេសទួរគី ដល់យោធានៅឆ្នាំនេះ ដែលកើនឡើងពី ១០០ ប្រភេទកាលពីឆ្នាំមុន ព្រមទាំងបន្ថែមគ្រឿងបន្លាស់ថ្មីទៅក្នុងសារពើភ័ណ្ឌរបស់ខ្លួន។ 

ក្រុមហ៊ុនក៏បានបង្ហាញ យានគ្មានមនុស្សបើកលើផ្ទៃទឹកkamikaze និងយានក្រោមទឹកគ្មានមនុស្សបើក kamikaze នៅក្នុងពិព័រណ៍នេះផងដែរ។