ក្រុមចម្រុះនៃប្រទេសចំនួន ១៣ រួមមានប្រទេសប៉ាគីស្ថាន ឥណ្ឌូនេស៊ី ទួរគី អេស្ប៉ាញ និងអាហ្វ្រិកខាងត្បូង បានចេញសេចក្តីថ្លែងការណ៍រួមថ្កោលទោសការស្ទាក់ចាប់ និងការចាប់ពង្រត់សកម្មជន ដែលចូលរួមក្នុងក្បួនទូក Global Sumud ខណៈកំពុងព្យាយាមនាំយកជំនួយទៅកាន់តំបន់ហ្កាហ្សាហែកហួរដោយសង្គ្រាម។

រដ្ឋមន្ត្រីការបរទេសនៃប្រទេសទាំង ១៣ បាននិយាយថា ពួកគេ «ថ្កោលទោសយ៉ាងខ្លាំងចំពោះការវាយប្រហាររបស់អ៊ីស្រាអែល» លើក្បួនទូក ដែលជា «គំនិតផ្តួចផ្តើមស៊ីវិលដោយសន្តិវិធី» ក្នុងបំណងបង្ហាញពី «មហន្តរាយមនុស្សធម៌» នៅក្នុងតំបន់ហ្កាហ្សា។

ពួកគេចាត់ទុកការវាយប្រហារកាលពីថ្ងៃទី ៣០ ខែមេសា លើក្បួនទូក និងការចាប់ពង្រត់សកម្មជន ដែលកំពុងធ្វើដំណើរក្នុងដែនទឹកអន្តរជាតិនៅជិតឆ្នេរប្រទេសក្រិកថា ជា «ការរំលោភបំពានធ្ងន់ធ្ងរ» លើច្បាប់អន្តរជាតិ និងអនុសញ្ញាសមុទ្រ។ ក្រុមរដ្ឋមន្ត្រី បាននិយាយនៅក្នុងសេចក្តីថ្លែងការណ៍ថា «ការឃុំខ្លួនសកម្មជនមនុស្សធម៌ដោយខុសច្បាប់នៅក្នុងដែនទឹកអន្តរជាតិ គឺជាការរំលោភបំពានធ្ងន់ធ្ងរលើច្បាប់មនុស្សធម៌អន្តរជាតិ»។ ក្រុមនេះបានបង្ហាញការព្រួយបារម្ភយ៉ាងខ្លាំងចំពោះសុវត្ថិភាពរបស់សកម្មជនដែលនៅតែជាប់ក្នុងមន្ទីរឃុំឃាំង ហើយបានជំរុញឱ្យអាជ្ញាធរអ៊ីស្រាអែលធានាបាន «ការដោះលែងជាបន្ទាន់ និងដោយគ្មានលក្ខខណ្ឌ» ។ រដ្ឋមន្ត្រីនៃប្រទេសទួរគី បង់ក្លាដែស ប្រេស៊ីល កូឡុំប៊ី ឥណ្ឌូនេស៊ី ហ្ស៊កដានី លីប៊ី ម៉ាឡេស៊ី ម៉ាល់ឌីវ ម៉ូរីតានី ប៉ាគីស្ថាន អាហ្វ្រិកខាងត្បូង និងអេស្ប៉ាញ ក៏បានអំពាវនាវដល់ «សហគមន៍អន្តរជាតិឱ្យបំពេញកាតព្វកិច្ចខាងសីលធម៌ និងផ្លូវច្បាប់ ដើម្បីគោរពច្បាប់អន្តរជាតិ ការពារជនស៊ីវិល និងធានាការទទួលខុសត្រូវចំពោះការរំលោភបំពានទាំងនេះ»។