តុលាការឧទ្ធរណ៍កូរ៉េខាងត្បូង នៅថ្ងៃព្រហស្បតិ៍ (ទី៧ ខែឧសភា ឆ្នាំ២០២៦) នេះ បានសម្រេចកាត់បន្ថយទោសជាប់ពន្ធនាគារ សម្រាប់អតីតនាយករដ្ឋមន្ត្រី លោក Han Duck-soo មកត្រឹម ១៥ឆ្នាំ ដោយបន្ថយពីរយៈបេល ២៣ឆ្នាំ ក្នុងសំណុំរឿង ពាក់ព័ន្ធនឹងតួនាទីរបស់លោក អំឡុងពេលមានការចេញច្បាប់អាជ្ញាសឹករយៈពេលខ្លីដោយអតីតប្រធានាធិបតី លោក Yoon Suk Yeol ក្នុងឆ្នាំ២០២៤។

មួយគ្នានេះ តុលាការឧទ្ធរណ៍ បានតម្កល់ការរកឃើញរបស់តុលាការជាន់ទាប ដែលថា លោក Han បានចូលរួមក្នុងសកម្មភាពសំខាន់ៗ ដើម្បីជួយលោក Yoon ប្រកាសច្បាប់អាជ្ញាសឹក ហើយមិនបានបញ្ចុះបញ្ចូលរូបលោកកុំឲ្យធ្វើបែបនោះឡើយ។ ចៅក្រមបានលើកឡើងថា លោក Han វ័យ ៧៦ឆ្នាំ បានកោះប្រជុំគណៈរដ្ឋមន្ត្រី ដើម្បីសម្រួលដល់នីតិវិធីផ្លូវច្បាប់ ក្នុងការចេញច្បាប់អាជ្ញាសឹក ដោយបដិសេធការអះអាងរបស់លោក ដែលថា ការប្រជុំនោះ មានបំណងរារាំងលោក Yoon។

តែយ៉ាងណាក្ដី ចៅក្រមបានបញ្ជាក់ថា តុលាការបានពិចារណាដល់អាជីពរយៈពេល ៥០ឆ្នាំរបស់លោក Han ក្នុងការងារសាធារណៈ រួមទាំងមុខតំណែងនៅក្រសួងហិរញ្ញវត្ថុ និងក្រសួងការបរទេសផងដែរ។ ហើយចៅក្រមបានបន្ថែមថា វាក៏មិនមានការបញ្ជាក់យ៉ាងច្បាស់លាស់នោះដែរថា តើលោក Han បានចូលរួមយ៉ាងសកម្ម នៅក្នុងផែនការរបស់លោក Yoon ដែរ ឬយ៉ាងណា ដោយកត់សម្គាល់ពីរបៀបដែលលោកបានកោះប្រជុំគណៈរដ្ឋមន្ត្រីមួយផ្សេងទៀត ដើម្បីលុបចោលច្បាប់អាជ្ញាសឹក បន្ទាប់ពីសភាបានបោះឆ្នោតបដិសេធ។

គួរបញ្ជាក់ថា តុលាការជាន់ទាប កាលពីខែមករា បានកាត់ទោសលោក Han ឲ្យជាប់ពន្ធនាគាររយៈពេល ២៣ឆ្នាំ ដោយលើកឡើងថា លោក «បានធ្វើមិនដឹងមិនឮ» ចំពោះផែនការច្បាប់អាជ្ញាសឹក និងបានចូលរួមក្នុងសកម្មភាពបះបោរដ៏ធំមួយ។ រដ្ឋអាជ្ញា ដែលបានស្នើឲ្យមានការកាត់ទោសជាប់ពន្ធនាគាររយៈពេល ១៥ឆ្នាំ មុនសេចក្ដីសម្រេចលើកដំបូង បានស្វែងរកការកាត់ទោសឲ្យជាប់ពន្ធនាគាររយៈពេល ២៣ឆ្នាំ សម្រាប់បណ្តឹងឧទ្ធរណ៍៕