ប្រធានាធិបតីបារាំង លោក Emmanuel Macron បាននិយាយកាលពីថ្ងៃពុធ (ទី៦ ខែឧសភា ឆ្នាំ២០២៦) ថា លោកបានជួបពិភាក្សាបន្ថែមទៀតជាមួយសមភាគីអ៊ីរ៉ង់ លោក Masoud Pezeshkian ជាពេលដែលលោក Macron បានបញ្ជាក់ជាថ្មី អំពីសារៈសំខាន់នៃផ្ដល់សេរីភាពដល់ការដឹកជញ្ជូន នៅច្រកសមុទ្រ Hormuz។

លោក Macron បានបន្ថែមថា លោកបានជំរុញឲ្យប្រធានាធិបតីអ៊ីរ៉ង់ពិនិត្យមើលផែនការរបស់ប្រទេសបារាំង និងអង់គ្លេស ក្នុងការបង្កើតបេសកកម្មអន្តរជាតិមួយ ដើម្បីរៀបចំនូវមូលដ្ឋានគ្រឹះ សម្រាប់ការដឹកជញ្ជូនដោយសុវត្ថិភាពតាមរយៈច្រកសមុទ្រ Hormuz។

លោក Macron បានបន្ថែមនៅលើបណ្ដាញសង្គម X ថា៖ «ខ្ញុំបានជំរុញឲ្យប្រធានាធិបតីអ៊ីរ៉ង់ឆក់យកឱកាសនេះ ហើយខ្ញុំមានបំណងពិភាក្សា អំពីប្រធានបទនេះ ជាមួយប្រធានាធិបតីអាមេរិក លោក (Donald) Trump»។

ចំណែកប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា ក្នុងឱកាសនៃការសន្ទនាតាមទូរស័ព្ទនោះ លោក Pezeshkian «បានសង្កត់ធ្ងន់ថា អ៊ីរ៉ង់ ក្នុងក្របខ័ណ្ឌនៃច្បាប់អន្តរជាតិ ត្រៀមខ្លួនរួចជាស្រេច ដើម្បីបន្តផ្លូវការទូតយ៉ាងម៉ឺងម៉ាត់ ដើម្បីបញ្ចប់សង្គ្រាមនេះ ក្នុងគោលបំណងឆ្ពោះទៅរកការសម្រេចបាននូវសិទ្ធិស្របច្បាប់របស់ប្រជាជនអ៊ីរ៉ង់»៕