ក្រុមសិទ្ធិមនុស្សអន្តរជាតិមួយបានលើកឡើងកាលពីថ្ងៃសុក្រសប្តាហ៍មុនថា យោធាមីយ៉ាន់ម៉ាគួរតែធានាថា ជំនួយមនុស្សធម៌ទៅដល់ជនស៊ីវិលទាំងអស់ដែលរងផលប៉ះពាល់ដោយការប៉ះទង្គិចគ្នា នៅភាគខាងជើងប្រទេសរវាងកងទ័ព និងក្រុមប្រដាប់អាវុធជនជាតិភាគតិច។

អរិភាពរវាងយោធាមីយ៉ាន់ម៉ា និងក្រុមឧទ្ទាមនៃកងទ័ពឯករាជ្យកាឈីន បានកើនឡើង នៅពាក់កណ្តាលខែមករា ដោយរួមបញ្ចូលឃុំចំនួនបីនៃរដ្ឋនេះ។ កម្លាំងកាឈីន គឺជាកងជីវពលជនជាតិភាគតិចដ៏មានឥទ្ធិពលបំផុតមួយ ហើយបានប៉ះទង្គិចជាមួយយោធា បន្ទាប់ពីកិច្ចព្រមព្រៀងឈប់បាញ់រយៈពេល ១៧ ឆ្នាំបានបរាជ័យ ក្នុងឆ្នាំ ២០១១។ ចាប់តាំងពីពេលនោះមក មនុស្សជាង ១២០.000 នាក់ ត្រូវបានផ្លាស់ទីលំនៅ នៅក្នុងតំបន់តាមបណ្តោយព្រំដែនជាមួយប្រទេសចិន។

វិបត្តិដែលកំពុងបន្តកើតមាននៅក្នុងរដ្ឋនេះ ត្រូវបានគ្របដណ្ដប់ដោយវិបត្តិមួយ នៅក្នុងរដ្ឋ Rakhine ភាគខាងលិចរបស់ប្រទេសមីយ៉ាន់ម៉ា ជាកន្លែងដែលសមាជិកជិត ៧០០.000នាក់នៃក្រុមជនជាតិភាគតិចមូស្លីមរ៉ូហ៊ីងយ៉ា បានភៀសខ្លួនទៅកាន់ប្រទេសបង់ក្លាដែស ចាប់តាំងពីខែសីហាឆ្នាំមុន ដើម្បីគេចពីការបង្ក្រាបយ៉ាងឃោរឃៅដោយយោធា និងការរើសអើងនៅក្នុងសង្គម និងភាពក្រីក្រ៕