សហរដ្ឋអាមេរិក និងអ៊ីរ៉ង់ បានបាញ់តបតគ្នាកាលពីថ្ងៃព្រហស្បតិ៍៧ឧសភាសប្ដាហ៍នេះ ក្នុងការសាកល្បងដ៏ធ្ងន់ធ្ងរបំផុតនៃបទឈប់បាញ់រយៈពេលមួយខែរវាងប្រទេសទាំងពីរ ប៉ុន្តែអ៊ីរ៉ង់និយាយថាស្ថានភាពបានវិលមករកសភាពធម្មតាវិញ ខណៈអាមេរិកនិយាយថាពួកគេមិនចង់ឲ្យជម្លោះកើនឡើងទេ។

យោធាអ៊ីរ៉ង់បាននិយាយថាសហរដ្ឋអាមេរិក បានកំណត់គោលដៅលើនាវាពីរគ្រឿងដែលចូលទៅក្នុងច្រកសមុទ្រ Hormuz ហើយបានបើកការវាយប្រហារលើទឹកដីអ៊ីរ៉ង់។ យោធាអាមេរិកបាននិយាយថាខ្លួនបានបាញ់តបវិញចំពោះការវាយប្រហាររបស់អ៊ីរ៉ង់។

លោក Trump បានប្រាប់អ្នកសារព័ត៌មាន ABC ថាបទឈប់បាញ់នៅតែជាធរមាន ហើយបានព្យាយាមបន្ថយការប៉ះទង្គិចគ្នា។យោងតាមការបង្ហោះនៅលើប្រព័ន្ធផ្សព្វផ្សាយសង្គមរបស់លោក លោក Trump បានសរសេរថា វាគ្រាន់តែជាការប៉ះទង្គិចគ្នាប៉ុណ្ណោះ។ ប្រព័ន្ធផ្សព្វផ្សាយរដ្ឋអ៊ីរ៉ង់បាននិយាយបន្ទាប់ពីការវាយប្រហារថាស្ថានភាពបានវិលមករកសភាពធម្មតាវិញហើយ។

អរិភាពដែលនៅតែបន្តបានផ្ទុះឡើង ខណៈទីក្រុងវ៉ាស៊ីនតោនកំពុងរង់ចាំការឆ្លើយតបរបស់អ៊ីរ៉ង់ចំពោះសំណើរបស់សហរដ្ឋអាមេរិកដែលនឹងបញ្ឈប់ការប្រយុទ្ធគ្នា ប៉ុន្តែទុកឱ្យបញ្ហាដ៏ចម្រូងចម្រាសបំផុត ដូចជាកម្មវិធីនុយក្លេអ៊ែររបស់អ៊ីរ៉ង់ មិនទាន់ត្រូវបានដោះស្រាយសម្រាប់ពេលនេះ។

ភាគីទាំងពីរបានបាញ់តបតគ្នាម្តងម្កាលចាប់តាំងពីបទឈប់បាញ់ចូលជាធរមាននៅថ្ងៃទី ៧ ខែមេសា ២០២៦ ។បញ្ជាការយោធារួមជាន់ខ្ពស់របស់អ៊ីរ៉ង់ បានចោទប្រកាន់សហរដ្ឋអាមេរិកពីបទរំលោភលើបទឈប់បាញ់ដោយកំណត់គោលដៅលើនាវាដឹកប្រេងអ៊ីរ៉ង់មួយគ្រឿង និងនាវាមួយផ្សេងទៀត ព្រមទាំងបានវាយប្រហារតាមអាកាសលើតំបន់ស៊ីវិលនៅលើកោះ Qeshm ក្នុងច្រកសមុទ្រ និងតំបន់ឆ្នេរសមុទ្រក្បែរៗតំបន់ Bandar Khamir Sirik នៅលើដីគោក។ យោធាបាននិយាយថា ខ្លួនបានឆ្លើយតបដោយការវាយប្រហារនាវាយោធាអាមេរិកនៅភាគខាងកើតនៃច្រកសមុទ្រ Hormuz និងភាគខាងត្បូងនៃកំពង់ផែ Chabahar៕