ប្រធានាធិបតីសហរដ្ឋអាមេរិក លោក Donald Trump កាលពីថ្ងៃព្រហស្បតិ៍ ទី៧ ខែឧសភា បាននិយាយថា សហភាពអឺរ៉ុបត្រូវតែផ្តល់សច្ចាប័នលើកិច្ចព្រមព្រៀងពាណិជ្ជកម្មរបស់ខ្លួនជាមួយសហរដ្ឋអាមេរិក នៅត្រឹមថ្ងៃទី៤ ខែកក្កដា បើមិនដូច្នេះត្រូវប្រឈមនឹងការដំឡើងពន្ធ «កាន់តែខ្ពស់ជាងនេះ» បន្ទាប់ពីមន្ត្រីអឺរ៉ុប មិនបានឈានដល់កិច្ចព្រមព្រៀង។

ប្រធានាធិបតីអាមេរិក បាននិយាយថា លោកបាននិយាយទៅកាន់ប្រធានសហភាពអឺរ៉ុប លោកស្រី Ursula von der Leyen អំពីបញ្ហានេះ ហើយ «បានយល់ព្រមផ្តល់ពេលឱ្យលោកស្រីរហូតដល់ខួបលើកទី២៥០ របស់ប្រទេសយើង បើមិនដូច្នេះ គួរឲ្យសោកស្តាយ ការដំឡើងពន្ធរបស់ពួកគេនឹងដំឡើងភ្លាមៗដល់កម្រិតកាន់តែខ្ពស់»។

ថ្ងៃឈប់សម្រាក ទី៤ ខែកក្កដា ឆ្នាំនេះ គឺជាខួបលើកទី២៥០ ចាប់តាំងពីអាណានិគមអាមេរិក បានប្រកាសឯករាជ្យពីការគ្រប់គ្រងរបស់អង់គ្លេស។ ប្លុកសហភាពអឺរ៉ុបដែលមានសមាជិក២៧ប្រទេស និងសហរដ្ឋអាមេរិក បានឈានដល់កិច្ចព្រមព្រៀងមួយកាលពីខែកក្កដា ឆ្នាំមុន ដោយកំណត់ការដំឡើងពន្ធលើទំនិញភាគច្រើនរបស់សហភាពអឺរ៉ុប១៥ភាគរយ ប៉ុន្តែកំណែចុងក្រោយនៃកិច្ចព្រមព្រៀងនៅតែត្រូវការការយល់ព្រមពីរដ្ឋជាសមាជិក ដែលបង្កឱ្យមានការខកចិត្តនៅក្នុងទីក្រុងវ៉ាស៊ីនតោន។

លោក Trump បានប្តេជ្ញាកាលពីសប្តាហ៍មុនថានឹងដំឡើងពន្ធលើរថយន្ត និងរថយន្តដឹកទំនិញរបស់សហភាពអឺរ៉ុបដល់២៥ភាគរយ ដោយចោទប្រកាន់ប្លុកនេះថាមិនបានអនុវត្តតាមកិច្ចព្រមព្រៀង។