ទីភ្នាក់ងារសារព័ត៌មានរដ្ឋ Xinhua បានរាយការណ៍កាលពីថ្ងៃព្រហស្បតិ៍ ៧ ឧសភាសប្ដាហ៍នេះ ថាអតីតរដ្ឋមន្ត្រីការពារជាតិចិន លោក Wei Fenghe និងលោក Li Shangfu ត្រូវបានកាត់ទោសប្រហារជីវិត ដោយព្យួរទោសរយៈពេលពីរឆ្នាំ ពីបទប្រព្រឹត្តអំពើពុករលួយ ដោយបានបញ្ជាក់ពីភាពធ្ងន់ធ្ងរនៃការបោសសម្អាតនៅក្នុងជួរយោធា។របាយការណ៍កាលពីកន្លងទៅរបស់ Xinhua និយាយថា លោកLi ត្រូវគេសង្ស័យថាបានទទួលប្រាក់យ៉ាងច្រើនជាសំណូកក៏ដូចជាសូកប៉ាន់អ្នកដទៃ ហើយការស៊ើបអង្កេតមួយបានរកឃើញថា លោកពុំបានបំពេញកាតព្វកិច្ចនយោបាយ និងស្វែងរកអត្ថប្រយោជន៍បុគ្គលិកសម្រាប់ខ្លួនលោក និងអ្នកដទៃ។

សារព័ត៌មាន Xinhua បានរាយការណ៍ក្នុងឆ្នាំ ២០២៤ថា ការស៊ើបអង្កេតមួយដែលបានចាប់ផ្តើមលើលោក Wei ក្នុងឆ្នាំ ២០២៣ បានរកឃើញថា លោកបានទទួល «ប្រាក់ និងវត្ថុមានតម្លៃយ៉ាងច្រើន» ជាសំណូកនិង«បានជួយអ្នកដទៃទទួលបានអត្ថប្រយោជន៍មិនត្រឹមត្រូវក្នុងការរៀបចំបុគ្គលិក» ដោយបន្ថែមថាទង្វើរបស់លោកគឺ «មានលក្ខណៈធ្ងន់ធ្ងរខ្លាំង ដែលមានផលប៉ះពាល់យ៉ាងខ្លាំង និងគ្រោះថ្នាក់យ៉ាងខ្លាំង»។

នៅក្នុងប្រទេសចិន ការកាត់ទោសប្រហារជីវិតដោយមានការព្យួរទោស ដែលក៏ត្រូវបានគេស្គាល់ផងដែរថាជាការផ្អាកទោសប្រហារជីវិត ជាធម្មតាត្រូវបានប្តូរទៅជាការជាប់ពន្ធនាគារអស់មួយជីវិត ប្រសិនបើជនល្មើសពុំបានប្រព្រឹត្តបទឧក្រិដ្ឋក្នុងអំឡុងពេលនៃការព្យួរទោស។

សារព័ត៌មានខាងលើបាននិយាយថា បន្ទាប់ពីការសម្រាលទោស លោកទាំងពីរនឹងត្រូវជាប់ពន្ធនាគារអស់មួយជីវិត ដោយទំនងជាមិនមានការលើកលែងទោសបន្ថែមទៀតឬការដាក់ឲ្យនៅក្រៅឃុំទេ ។ សារព័ត៌មានដដែលនេះបានបន្ថែមថា មន្ត្រីទាំងពីររូប នេះក៏ត្រូវបានដកហូតសិទ្ធិនយោបាយអស់មួយជីវិតផងដែរ ហើយទ្រព្យសម្បត្តិផ្ទាល់ខ្លួនទាំងអស់របស់ពួកគេនឹងត្រូវរឹបអូស។លោក Wei អតីតមេបញ្ជាការកងកម្លាំងរូកែតពីឆ្នាំ២០១៥ដល់២០១៧ ត្រូវបានជំនួសដោយលោក Li ជាទីប្រឹក្សារដ្ឋ និងជារដ្ឋមន្ត្រីក្រសួងការពារជាតិក្នុងខែមីនាឆ្នាំ ២០២៣។លោក Liជាឧត្តមសេនីយ៍មួយរូបក្នុងចំណោមឧត្តមសេនីយ៍ដែលលោកXi ទុកចិត្តបំផុត បានត្រួតពិនិត្យការផលិត និងការផ្គត់ផ្គង់អាវុធ និងដឹកនាំចក្ខុវិស័យរបស់លោក Xi ស្តីពីការធ្វើទំនើបកម្មយោធា។ លោកគឺជាមេដឹកនាំចាស់វស្សានៃកម្មវិធីអវកាសដ៏មានមហិច្ឆតារបស់ចិន ដោយត្រួតពិនិត្យបេសកកម្មអវកាសជាច្រើន៕