លោក អ៊ុង តារា គ្រូបង្វឹកក្រុមបាល់ទាត់កុមារា នៃខេត្តស្វាយរៀង បានដាក់គោលដៅលេង ១២០% ​សម្រាប់ជំនួបវគ្គផ្ដាច់ព្រ័ត្រ ទល់ក្រុមបាល់ទាត់កុមារារាជធានីភ្នំពេញ នៃ​កីឡា​សិស្ស​បឋម​សិក្សា​ថ្នាក់​ជាតិ ឆ្នាំ២០២៦ នាថ្ងៃទី៩ ខែឧសភាស្អែកនេះ នៅ​ពហុកីឡ​ដ្ឋាន​ជាតិ​(អូឡាំពិក)។

ការប្ដេជ្ញាចិត្តនេះ បន្ទាប់ពីលោកបានដឹកនាំក្រុម យកឈ្នះក្រុមបាល់ទាត់កុមារាខេត្តក្រចេះ ដោយ​លទ្ធផល ​៣-១ ក្នុងវគ្គពាក់កណ្ដាលផ្ដាច់ព្រ័ត្រ ស្របពេលក្រុមកុមារារាជធានីភ្នំពេញ បានយ​ក​ឈ្នះ​ខេត្ត​បន្ទាយ​មានជ័យ ១-០ កាលពីថ្ងៃទី៧ ខែឧសភា ឆ្នាំ២០២៦ កន្លងទៅ។

លោក អ៊ុង តារា បានសម្ដែងក្ដីរីករាយ ដែលកូនក្រុមធ្វើបានល្អក្នុងវគ្គប្រជុំដោយក្រុមខ្លាំងៗ ហើយ​លោក​នឹង​ព្យាយាមបំពេញនូវចំណុចខ្វះខាត ជាមួយការ​ប្ដេជ្ញា​ជំរុញ​ក្រុម​លេង​ឲ្យអ​ស់​ពី​លទ្ធភាព​ដែល​អាច​ធ្វើបាន នៅវគ្គផ្ដាច់ព្រ័ត្រ ដើម្បីសម្រេចគោលដៅដណ្ដើមមេដាយមាសជូនខេត្ត។

ជាមួយគ្នាកុមារា សុខ ស៊ីឈូ ក៏បានសម្ដែងការសប្បាយរីករាយផងដែរ ដែល​បាន​រួម​ចំណែក​ជួយ​ក្រុម​ខ្លួន​ឡើង​វគ្គផ្ដាច់ព្រ័ត្រ ហើយសង្ឃឹមថា មិត្តរួមក្រុមនឹងបន្ដធ្វើបានល្អ ក្នុងការប្រកួត​ដ៏​សំខា​ន់​ចុង​ក្រោយ ដើម្បីទទួលបានមេដាយមាសផងដែរ។

គួរដឹងថា វិញ្ញាសាបាល់ទាត់ នៃព្រឹត្តិការណ៍កីឡាសិស្សបឋមសិក្សាថ្នាក់ជាតិ ឆ្នាំ២០២៦ បាន​រក​ឃើញ​បេក្ខ​ភាពវគ្គផ្ដាច់ព្រ័ត្រ និងត្រូវប្រកួតកាត់សេចក្ដី នៅព្រឹកថ្ងៃទី៩ ខែឧសភាដូចគ្នា ក្នុង​នោះ​ផ្នែក​បុរស គឺក្រុមបាល់ទាត់កុមារាខេត្តស្វាយរៀង ត្រូវជួបរាជធានីភ្នំពេញ គ្រាដែលផ្នែកនារី ក្រុម​កុមារីខេត្តស្វាយរៀង ត្រូវជួបកុមារីខេត្តកំពង់ស្ពឺ៕ អត្ថបទ លី ឈុនឡា