ភ្នំពេញ៖ ប្រធានមនី្ទរសុខាភិបាលរាជធានីភ្នំពេញ ប្រាប់BTVព័ត៌មាន នាព្រឹកថ្ងៃទី១២ ខែមេសា នេះថា គិតត្រឹមថ្ងៃទី១១ ខែមេសាម្សិលមិញនេះ ការចាក់វ៉ាក់សាំងជូនកុមារអាយុចាប់ពី៣ឆ្នាំ រហូតដល់ក្រោម៥ឆ្នាំ ចំពោះដូសទី១ បានចំនួន៧០,៧៥% រីឯដូសទី២ បានចំនួន៣១,២០%។
ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ បានបន្តទៀតថា សព្វថ្ងៃទីតាំងចាក់វ៉ាក់សាំងបង្ការជំងឺកូវីដ-១៩ក្នុងមូលដ្ឋានរាជធានីភ្នំពេញ គឺមាននៅតាមមណ្ឌលសុខភាព និងមនី្ទរពេទ្យបង្អែកសរុបចំនួន៤២ទីតាំង មានក្រុមការងារគ្រូពេទ្យប្រចាំការ រងចាំទទួល និងចាក់វ៉ាក់សាំងជូនប្រជាពលរដ្ឋ កម្មករ កម្មការិនី រាប់បញ្ចូលទាំងកុមារ និងយុវវ័យ ទាំងដូសមូលដ្ឋាន ដូសជំរុញទី៣ និងដូសជំរុញទី៤។ ដូចនេះសូមបងប្អូនប្រជាពលរដ្ឋអញ្ជើញមកទទួលវ៉ាក់សាំងឲ្យបានគ្រប់ៗគ្នា។
ជាមួយគ្នានោះដែរ អាណាព្យាបាលនាំយកកូនៗអាយុ៣ឆ្នាំ រហូតដល់ក្រោម៥ឆ្នាំ មកទទួលវ៉ាក់សាំងដូសទី១ និងដូសទី២ប្រភេទស៊ីណូវ៉ាក់ មានគម្លាតរយៈពេល២៨ថ្ងៃ នៅមនី្ទរពេទ្យកុមារជាតិ បានលើកឡើងស្រដៀងគ្នាថា សព្វថ្ងៃជំងឺកូវីដ១៩ បន្តរីករាលដាលយ៉ាងលឿន ជាពិសេសបំប្លែងថ្មីប្រភេទអូមីក្រុង ដែលមានការវិវត្តន៍ចុងក្រោយគេនេះ។ ការពិតនៅពេលដែលកូនៗរបស់គាត់ ទទួលវ៉ាក់សាំងបង្ការជំងឺកូវីដ១៩នេះ គឺល្អខ្លាំងណាស់ ព្រោះបានចូលរួមទប់ស្កាត់ និងការពារកុំឲ្យរីករាលដាលបន្តទៀត។
ទន្ទឹមគ្នានោះដែរ លោកសាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ បានបញ្ជាក់ថា បច្ចុប្បន្នក្រុមការងារគ្រូពេទ្យ បានធ្វើការយ៉ាងសកម្ម ក្នុងការផ្តល់វ៉ាក់សាំងជូនដល់ប្រជាពលរដ្ឋទាំងអស់ ដើម្បីជួយទប់ស្កាត់ការរីករាលដាលនូវមេរោគកូវីដ១៩។
ជាពិសេសសូមអំពាវនាវដល់បងប្អូនប្រជាពលរដ្ឋទាំងអស់ នាឱកាសចូលឆ្នាំថ្មីប្រពៃណីជាតិខាងមុខនេះ ត្រូវប្រកាន់ខ្ជាប់ការចូលរួមអនុវត្តនូវវិធានការសុខាភិបាល និងវិធានការ ៣ការពារ និង៣កុំ របស់សម្តេចតេជោ ហ៊ុន សែន នាយករដ្ឋមន្រី្ត ៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
