ប្រធានអង្គការសុខភាពពិភពលោក(WHO) និយាយថា ករណីឆ្លងវីរុស Hanta បន្ថែមទៀត «អាចត្រូវបានរាយការណ៍» ទាក់ទងនឹងនាវាទេសចរណ៍ដែលរងផលប៉ះពាល់ដោយវីរុសនេះ ប៉ុន្តែហានិភ័យចំពោះសុខភាពសាធារណៈមាន «ទាប»។

អគ្គនាយកអង្គការសុខភាពពិភពលោក លោក Tedros Adhanom Ghebreyesus បានថ្លែងដូច្នេះកាលពីថ្ងៃព្រហស្បតិ៍ ដោយចាត់ទុកស្ថានភាពនេះថា «ជាឧប្បត្តិហេតុធ្ងន់ធ្ងរ»។ លោក Tedros បាននិយាយថា ការឆ្លងវីរុស Hanta ចំនួនពីរករណីបន្ថែមទៀតត្រូវបានបញ្ជាក់ ដែលធ្វើឱ្យចំនួនសរុបកើនឡើងដល់៨ករណី រួមទាំងករណីសង្ស័យចំនួនបីករណី ហើយមនុស្សបីនាក់បានស្លាប់។

ករណីឆ្លងវីរុស Hanta ភាគច្រើន បណ្តាលមកពីការប៉ះពាល់ជាមួយពពួកសត្វកកេរដែលឆ្លងវីរុស ឬទឹកនោម លាមក និងទឹកមាត់របស់វា។ ការធ្វើតេស្ត បានកំណត់អត្តសញ្ញាណវីរុស Andes ជាប្រភេទជាក់លាក់នៃវីរុស Hanta ក្នុងករណីជាច្រើន។ ការចម្លងពីមនុស្សទៅមនុស្ស ត្រូវបានកត់ត្រាក្នុងឯកសារកាលពីពេលមុននៅអាមេរិកខាងត្បូង។ លោក Tedros និយាយថា រយៈពេលបង្ករោគ វីរុស Andes អាចមានរយៈពេលរហូតដល់៦សប្តាហ៍។ លោកស្រី Maria Van Kerkhove នាយកផ្នែកគ្រប់គ្រងនិងបង្ការជំងឺរាតត្បាតរបស់អង្គការសុខភាពពិភពលោក បានសង្កត់ធ្ងន់ថា ស្ថានភាពបច្ចុប្បន្ន «ពុំមែនជាការចាប់ផ្តើមនៃជំងឺរាតត្បាត COVID ទេ»។ លោកស្រី បាននិយាយបន្ថែមថា នេះគឺជាការផ្ទុះឡើងវីរុសឆ្លងនៅលើនាវា ហើយមាន «តំបន់កំណត់»។ នាវាទេសចរណ៍នេះ កំពុងធ្វើដំណើរនៅលើមហាសមុទ្រអាត្លង់ទិក។ វាត្រូវបានគេរំពឹងថានឹងទៅដល់កោះ Tenerife ជាកោះមួយក្នុងចំណោមប្រជុំកោះ Canary របស់ប្រទេសអេស្ប៉ាញ នៅថ្ងៃអាទិត្យ។ អង្គការសុខភាពពិភពលោក (WHO) និយាយថា អ្នកជំនាញម្នាក់របស់ខ្លួនបានឡើងលើនាវា ហើយត្រូវបានចូលរួមដោយវេជ្ជបណ្ឌិតពីរនាក់មកពីប្រទេសហូឡង់ និងអ្នកជំនាញម្នាក់ទៀតមកពីមជ្ឈមណ្ឌលបង្ការ និងគ្រប់គ្រងជំងឺនៅអឺរ៉ុប។