មីយ៉ាន់ម៉ា៖ ក្រុមអ្នកស៊ើបអង្កេតរបស់អង្គការសហប្រជាជាតិ លើបញ្ហានយោបាយនៅក្នុងសហភាពមីយ៉ាន់ម៉ា កាលពីថ្ងៃពុធបានអំពាវនាវឲ្យប្រជាពលរដ្ឋ ជួយប្រមូលរក្សាទុកភស្តុតាងជាឯកសារជាក់លាក់ពីបទឧក្រិដ្ឋកម្ម ដែលត្រូវបានបញ្ជាដោយយោធាមីយ៉ាន់ម៉ា ចាប់តាំងពីរដ្ឋប្រហារថ្ងៃទី១ ខែកុម្ភៈមក ដើម្បីករសាងសំណុំរឿងប្រឆាំងនឹងក្រុមមេដឹកនាំរបបនេះ។
ក្រុមសកម្មជនសហគមន៍ជំនួយ សម្រាប់អ្នកទោសនយោបាយបាននិយាយថា ក្រុមអ្នកតវ៉ាជាង ១៨០នាក់ត្រូវបានសម្លាប់ដោយកងកម្លាំងសន្តិសុខ ដែលកំពុងព្យាយាមបង្ក្រាបរលកបាតុកម្ម ចាប់តាំងពីរបបសឹកនេះបានដណ្ដើមក្ដោបក្ដាប់អំណាច ក្នុងប្រទេសនៅតំបន់អាស៊ីអាគ្នេយ៍មួយនេះ។ ប្រធានក្រុមស៊ើបអង្កេតរបស់អង្គការសហប្រជាជាតិ ដែលមានមូលដ្ឋាននៅក្នុងទីក្រុងហ្សឺណែវប្រទេសស្វីស លោក Nicholas Koumjian បាននិយាយនៅក្នុងសេចក្ដីថ្លែងការណ៍មួយថា បុគ្គលដែលទទួលខុសត្រូវខ្ពស់បំផុត ចំពោះឧក្រិដ្ឋកម្មអន្តរជាតិដ៏ធ្ងន់ធ្ងរបំផុត ជាធម្មតាគឺជាមនុស្សដែលកាន់តំណែងខ្ពស់ ក្នុងការដឹកនាំនោះ។ ពួកគេមិនមែនជាអ្នកដែលប្រព្រឹត្តបទឧក្រិដ្ឋដោយផ្ទាល់ទេ ហើយជារឿយៗមិនបង្ហាញមុខនៅនឹងកន្លែងកើតហេតុ ដែលមានការប្រព្រឹត្តឧក្រិដ្ឋកម្មនោះទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
