កណ្ដាល៖ មកដល់ថ្ងៃនេះ នៅសួនច្បារទន្លេបាសាក់ក្រុងតាខ្មៅ គេឃើញថា អាជ្ញាធរមូលដ្ឋាន បានដាក់គ្រឿងតុបតែង និងភ្លើងពណ៌លំអរសួនច្រើនកន្លែង ដើម្បីត្រៀមរៀបចំកម្មវិធីបើកសង្ក្រាន្តខេត្តកណ្តាល នៅថ្ងៃទី១៤ខែមេសានេះ ហើយទិដ្ឋភាពនេះ បាននិងកំពុងទាក់ទាញពលរដ្ឋមកពីទីជិតឆ្ងាយ មកដើរលេងកម្សាន្តជាបណ្តើរៗ។

ពលរដ្ឋ បានថ្លែងប្រាប់BTV នៅល្ងាចថ្ងៃទី១១ខែមេសានេះថា បន្ទាប់ពីមានតុបតែងគ្រឿង​លំអរសួន​ដែលមានដាក់ការដាក់ភ្លើងពណ៌ចំរុះមក​ បានធ្វើអោយសួនក្រុងតាខ្មៅ ​មាន​សោភ័ណភាព​សា្អត និង​មានភាពទាក់ទាញ ​ហើយពលរដ្ឋទាំងនោះ​ក៏បានថ្លែងថា ​នៅពេលនេះ​គេបានត្រៀមរួចហើយ នឹង​មកចូលរួម​លេងល្បែង​ប្រជាប្រិយ​កម្សាន្ត ​ចូលរួមរាំងស្គរដី​ និងមើលឃើញល្ខោន មើលការ​សំដែងសិល្បៈ ​ដែលជាកេរមរតកវប្បធម៌ខ្មែរ​កើតចេញពីទឹកដីខេត្តកណ្តាល។

បើតាមលោកជំទាវ ហ៊ុន កុសនី អភិបាលរងខេត្តកណ្តាល ​បានថ្លែងថា ​មកដល់ពេលនេះ សួនក្រុងតាខ្មៅដែលជាទីតាំងរៀបចំកម្មវិធីសង្ក្រាន្តដ៏ធំជាងគេ​របស់ខេត្តកណ្តាល ដើម្បី​អបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ​ ឆ្នាំខាល ដែលនឹងឈានចូល​មកដល់នៅ​ថ្ងៃទី១៤ដល់ថ្ងៃទី១៦ ខែមេសា ខានស្អែកនេះ​ គឺយើងបានរៀបចំបានជាង៩០% ហើយយើងរំពឹងថា នៅ​ថ្ងៃបើកកម្មវិធីសង្ក្រាន្តឈានចូលមកដល់ នឹងមានពលរដ្ឋអញ្ជើញចូលរួមច្រើនកើន​លើស​កាលពីពីរឆ្នាំមុន។

លោកជំទាវ បន្តថា សម្រាប់ពលរដ្ឋដែលចូលរួមកម្មវិធីសង្ក្រាន្តខេត្តកណ្តាលនេះ គឺយើង​តម្រូវ​អោយអ្នក​ចូលរួមទាំង​អស់ត្រូវធ្វើការពាក់ម៉ាស់ការពារខ្លួន​ចៀសផុត​ពីការឆ្លងមេរោគកូវីដ​ទាំង​អស់គ្នា ហើយរដ្ឋបាលខេត្តកណ្តាល​ នឹងមានផ្តល់ម៉ាស់​ជូនអ្នកចូលរួមណាមិនមាន​ម៉ាស់ពាក់ ហើយ​យើងក៏មានដាក់ក្រុមពេទ្យ ដើម្បីរងចាំពិនិត្យសុខភាព​ និងព្យាបាលជំងឺជូន​អ្នកចូលរួម ហើយ​នឹង​មាន​ការចាក់វ៉ាក់សាំង​ការពារកូវីដ១៩នៅគ្រប់ដូសទាំងអស់ ​ប្រសិនបើពលរដ្ឋដែលចូលរួមណាចង់​ចាក់វ៉ាក់សាំងនេះ នៅក្នុងអំឡុងពេលចូលមកដើរកម្សាន្តសង្ក្រាន្តនៅសួនច្បារក្រុងតាខ្មៅនេះ៕អត្ថបទ ស៊ុមសុខជា