កំពង់ស្ពឺ៖ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានអំពាវនាវកម្មករនិយោជិតទាំងអស់ ចូលរួមជាមួយអាជ្ញាធរ និងក្រសួងស្ថាប័នពាក់ព័ន្ធ ជំរុញកំណើនការវិនិយោគ និងរួមគ្នាកសាងភាពធន់ដើម្បីការងារសមរម្យ តាមរយៈពេលមានបញ្ហាអ្វីមួយ ត្រូវរកមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជួយដោះស្រាយ ជៀសជាងបង្កើតបាតុភាពផ្សេងៗ បង្កភាពរាងស្ទះដល់ការងារ ។

ក្នុងប្រារព្ធទិវាពលកម្មអន្តរជាតិ ១ឧសភា ឆ្នាំ២០២៦ និងសំណេះសំណាលជាមួយកម្មករនិយោជិត នៅទីតាំងរោងចក្រ សួស យ៉ាត អេ ស្ថិតក្នុងក្រុងច្បារមន នៅថ្ងៃទី៨ ខែឧសភា ឆ្នាំ២០២៦ ឯកឧត្តមអភិបាលខេត្តកំពង់ស្ពឺ បានថ្លែងថា ក្រោមយុទ្ធសាស្ត្រទាកម៉ូយរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើឱ្យខេត្តកំពង់ស្ពឺ មានការអភិវឌ្ឍន៍រីកចម្រើនគួរឱ្យកត់សម្គាល់ ជាពិសេស គឺវិស័យឧស្សាហកម្មកាត់ដេរ ខណៈបច្ចុប្បន្នខេត្តនេះមានរោងចក្រ សហគ្រាសប្រមាណជាង ១ ៦០០កន្លែង និងមានកម្មករនិយោជិត កំពុងបម្រើការប្រមាណជិត ៣៣ម៉ឺននាក់ ។

ឯកឧត្តមបានបន្តថា ជាមួយនិងកំណើនឥតឈប់ឈរ នៃរោងចក្រ សហគ្រាសនេះ បានប្រែក្លាយជីវភាពរបស់ប្រជាពលរដ្ឋ ដែលកន្លងមកធ្លាប់តែគេមើលងាយមើលបែបកំប្លែង ហើយចំអកឡកលើយថាជាខេត្តប៊ុមប៊ឺ ឱ្យមានជីវភាពធូរធា រីកចម្រើន និងស៊ីវិល័យតាមរយៈការងារ និងតម្លៃអចលនទ្រព្យ ។

ឯកឧត្តមបណ្ឌិត ជាម ច័ន្ទសោភ័ណ បានបន្ថែមថា ដើម្បីទទួលកំណើនការងារបន្ថែម សូមទឹកចិត្តទៅដល់ធុរជនទាំងអស់ ដែលបាននិងកំពុងរកស៊ីនៅក្នុងខេត្តកំពង់ស្ពឺ និងដាស់តឿនដល់កម្មករនិយោជិត ដែលមានការអាក់អន់ស្រពន់ចិត្តក្នុងរង្វង់ការងារ សូមរិះរកគ្រប់មធ្យោបាយដើម្បីដោះស្រាយ មិនត្រូវនាំគ្នាប្រមូលផ្តុំធ្វើបាតុកម្មឬកូដកម្មនោះឡើយ ការដែលជៀសវាងបាតុកម្ម ឬកូដកម្មបាន គឺជាការការពារឆ្នាំងបាយរបស់ខ្លួនឯង និងក្រុមគ្រួសារ ។

អភិបាលខេត្តកំពង់ស្ពឺ បានគូសបញ្ជាក់ថា សូមកុំជឿការញុះញង់ របស់ក្រុមណាមួយ ដែលចង់បំផ្លាញស្ថិរភាពរោងចក្រ និងសង្គម ហើយសូមប្រើប្រាស់យន្តការដោះស្រាយវិវាទការងារស្របច្បាប់ ដោយដាក់ញត្តិទៅកាន់ក្រសួងការងារ ឬមន្ទីរការងារជំនាញ ។ សូមរួមគ្នាផ្តោតលើការងារ និងការបង្កើនជំនាញ ដើម្បីទទួលបានប្រាក់ខែ និងអត្ថប្រយោជន៍កាន់តែប្រសើរ សូមរក្សាសាមគ្គីភាព និងសន្តិភាពនៅក្នុងរោងចក្រ ដើម្បីធានាថា មានការងារធ្វើបានជាប់លាប់ ៕ អត្ថបទ បាន សុខរិទ្ធិ