ទាំងប្រទេសរុស្ស៊ី និងអ៊ុយក្រែន នៅថ្ងៃសុក្រ (ទី៨ ខែឧសភា ឆ្នាំ២០២៦) នេះ សុទ្ធតែបានចោទប្រកាន់គ្នាទៅវិញទៅមកថា បានរំលោភលើបទឈប់បាញ់រយៈពេល ២ថ្ងៃ ដែលបានប្រកាសដោយទីក្រុងមូស្គូ ដើម្បីការពារការប្រារព្ធពិធីជ័យជម្នះរបស់សហភាពសូវៀតលើរបបណាហ្ស៊ីអាល្លឺម៉ង់។

ក្រសួងការពារជាតិរុស្ស៊ីបានឲ្យដឹងថា យានដ្រូនអ៊ុយក្រែនចំនួន ២៦៤គ្រឿង ត្រូវបានបាញ់ទម្លាក់ នាព្រឹកព្រលឹមថ្ងៃសុក្រនេះ ខណៈដែលអភិបាលក្រុងមូស្គូ លោក Sergei Sobyanin បាននិយាយថា រដ្ឋធានីមួយត្រូវបានកំណត់គោលដៅ ហើយមន្ត្រីបានបញ្ជាក់ថា តំបន់ Ural របស់ទីក្រុង Perm ត្រូវបានវាយប្រហារដោយយានដ្រូន។

រុស្ស៊ីបានប្រកាសបទឈប់បាញ់ចាប់ពីថ្ងៃទី៨ ដល់ថ្ងៃទី១០ ខែឧសភា ជាពេលដែលខ្លួនប្រារព្ធពិធីជ័យជម្នះរបស់សហភាពសូវៀតលើរបបណាហ្ស៊ីអាល្លឺម៉ង់ និងរៀបចំព្យុហយាត្រាយោធា នៅទីក្រុងមូស្គូ។ រុស្ស៊ីបានព្រមានថា ការប៉ុនប៉ងណាមួយរបស់អ៊ុយក្រែន ដើម្បីរំខានដល់ការប្រារព្ធពិធីនេះ នឹងនាំឲ្យមានការវាយប្រហារដោយមីស៊ីលដ៏ធំទៅលើទីក្រុងគីវ ហើយទីក្រុងមូស្គូបានប្រាប់អ្នកការទូតបរទេសឲ្យជម្លៀសចេញពីរដ្ឋធានីអ៊ុយក្រែន មុនពេលអាចកើតមានការសងសឹកណាមួយ។

ចំណែកប្រធានាធិបតីអ៊ុយក្រែន លោក Volodymyr Zelenskiy បាននិយាយថា កងកម្លាំងរុស្ស៊ី បានបន្តវាយប្រហារទីតាំងរបស់អ៊ុយក្រែន នៅថ្ងៃសុក្រនេះ ដោយលោកបានពណ៌នាថា ការធ្វើបែបនេះបង្ហាញថា រុស្ស៊ីមិនបាន «ប៉ុនប៉ងបញ្ឈប់ការបាញ់ប្រហារនៅតំបន់ជួរមុខសូម្បីតែបន្តិច»។

លោកបានបញ្ជាក់ថា គិតត្រឹមម៉ោង ៧ព្រឹកម៉ោង ក្នុងស្រុក (ត្រូវនឹងម៉ោង ៤រសៀល ម៉ោងសកល) មានការវាយប្រហាររបស់រុស្ស៊ីជាង ១៤០ដង លើទីតាំងតំបន់ជួរមុខរបស់ទីក្រុងគីវ។ ហើយមេដឹកនាំអ៊ុយក្រែនបានបន្ថែមថា កងកម្លាំងរុស្ស៊ី បានធ្វើការវាយប្រហារចំនួន ១០ដង នៅពេលយប់ និងបានបើកការវាយប្រហារដោយយានដ្រូនជាង ៨៥០ដង៕