ប្រភពចំនួន ៥ ដែលត្រូវបានប្រាប់អំពីការត្រៀមរៀបចំ បាននិយាយថា សេតវិមានបានអញ្ជើញគណៈប្រតិភូនាយកប្រតិបត្តិដែលមានចំនួនតិចជាងមុន ដើម្បីអមដំណើរលោកប្រធានាធិបតី Donald Trump ទៅកាន់ទីក្រុងប៉េកាំង នាសប្តាហ៍ក្រោយ ដែលឆ្លុះបញ្ចាំងពីការបែកបាក់នៅក្នុងរដ្ឋបាល ជុំវិញគោលនយោបាយសេដ្ឋកិច្ច ចំពោះប្រទេសចិន និងការរំពឹងទុកតិចតួច សម្រាប់កិច្ចប្រជុំកំពូល។

មិនដូចដំណើរទស្សនកិច្ចរបស់លោក Trump នៅចិន ក្នុងឆ្នាំ២០១៧ ឡើយ នៅពេលដែលលោកត្រូវបានអមដំណើរដោយនាយកប្រតិបត្តិជាន់ខ្ពស់ចំនួន ២៩រូប សេតវិមាន និងក្រសួងរតនាគារ បានពិចារណាអញ្ជើញតំណាងក្រុមហ៊ុនអាមេរិកប្រមាណជាជាង ១០រូបប៉ុណ្ណោះ។ នេះបើយោងតាមប្រភពចំនួន ៣ ក្នុងចំណោមប្រភពទាំង ៥រូបនោះ។

ទីភ្នាក់ងារសារព័ត៌មាន Reuters មិនអាចបញ្ជាក់ពីបញ្ជីពេញលេញនៃក្រុមហ៊ុនដែលត្រូវបានអញ្ជើញនោះទេ។ បើយោងតាមរបាយការណ៍របស់គេហទំព័រ Semafor បានបង្ហាញថា នាយកប្រតិបត្តិនៅក្នុងបញ្ជីអញ្ជើញ សម្រាប់ដំណើរទស្សនកិច្ចថ្ងៃទី ១៤-១៥ ខែឧសភា រួមមាននាយកប្រតិបត្តិមកពីក្រុមហ៊ុន Nvidia, Apple, Qualcomm, Citigroup និង Boeing។

ប្រភព ២ បានប្រាប់ឲ្យដឹងថា នាយកប្រតិបត្តិទាំងនោះ នឹងចូលរួមពិធីលៀងសាយភោជកម្រិតរដ្ឋជាមួយលោក Trump ដែលរៀបចំដោយប្រធានាធិបតីចិន លោក ស៊ី ជីនពីង (Xi Jinping)។ តែយ៉ាងណាក្ដី ពួកគេបាននិយាយថា ការអញ្ជើញទាំងនេះ ត្រូវបានផ្ញើទៅយឺតខ្លាំងខុសពីធម្មតា ដោយសារតែការមិនចុះសម្រុងគ្នា នៅក្នុងរដ្ឋបាល ជុំវិញទំហំគណៈប្រតិភូនាយកប្រតិបត្តិ និងអ្នកដែលត្រូវអញ្ជើញ៕