លោក Marco Rubio រដ្ឋមន្ត្រីការបរទេសសហរដ្ឋអាមេរិក កាលពីថ្ងៃសុក្របានសួរថា ហេតុអ្វីបានជាសម្ព័ន្ធមិត្ត រួមទាំងប្រទេសអ៊ីតាលី មិនគាំទ្រកិច្ចខិតខំប្រឹងប្រែងរបស់ទីក្រុងវ៉ាស៊ីនតោន ក្នុងការប្រឈមមុខជាមួយអ៊ីរ៉ង់ និងបើកច្រកសមុទ្រ Hormuz ឡើងវិញ។ លោក RUBIO និយាយ «មនុស្សគ្រប់គ្នានិយាយថា អ៊ីរ៉ង់គឺជាការគំរាមកំហែង អ៊ីរ៉ង់មិនអាចមានអាវុធនុយក្លេអ៊ែរបានទេ។ Okay ប៉ុន្តែអ្នកត្រូវតែធ្វើអ្វីមួយចំពោះរឿងនេះ។ លោកប្រធានាធិបតី កំពុងព្យាយាមធ្វើរឿងជាច្រើនអំពីបញ្ហានេះ ហើយខ្ញុំមិនយល់ថាហេតុអ្វីបានជាសម្ព័ន្ធមិត្តជាច្រើនមិនគាំទ្រ»។

ការថ្លែងដូច្នេះរបស់លោក ធ្វើឡើងបន្ទាប់ពីជំនួបជាមួយនាយករដ្ឋមន្ត្រីអ៊ីតាលី លោកស្រី Giorgia Meloni នៅទីក្រុងរ៉ូម។ លោក RUBIO និយាយថា «តើពិភពលោក នឹងទទួលយកដែរទេ ដែលបច្ចុប្បន្ន អ៊ីរ៉ង់ គ្រប់គ្រងផ្លូវទឹកអន្តរជាតិ? ប្រសិនបើចម្លើយគឺទេ នោះយើងមិនគិតថា អ៊ីរ៉ង់នឹងអាចគ្រប់គ្រងច្រកសមុទ្រ Hormuz បានទេ ។

ទីបញ្ជាការកណ្តាលសហរដ្ឋអាមេរិកតាមរយៈបណ្តាញ X ចេញផ្សាយថ្ងៃទី៤ ខែឧសភា ឆ្នាំ២០២៦ ក៏បានស្វែងរកការដោះស្រាយការខកចិត្តរបស់លោក Trump ចំពោះការច្រានចោលរបស់ប្រទេសអ៊ីតាលីក្នុងការគាំទ្រសង្គ្រាមអាមេរិក-អ៊ីស្រាអែល លើអ៊ីរ៉ង់ បន្ទាប់ពីទីក្រុងតេអេរ៉ង់ បានបិទច្រកសមុទ្រ Hormuz យ៉ាងមានប្រសិទ្ធភាពបន្ទាប់ពីការវាយប្រហារនៅថ្ងៃទី២៨ ខែកុម្ភៈ។

ក្រោយមក លោកស្រី Meloni បានពិពណ៌នាអំពីជំនួបរយៈពេល១ម៉ោងកន្លះជាមួយ លោក Rubio ថាជាការពិភាក្សាដោយស្មោះត្រង់ រវាងប្រទេសដែលមានឆន្ទៈការពារផលប្រយោជន៍ជាតិរបស់ខ្លួន ខណៈ ឱ្យតម្លៃដល់ភាពជាដៃគូឆ្លងមហាសមុទ្រអាត្លង់ទិក។