ឧត្ដរមានជ័យ៖ អភិបាលខេត្តឧត្តរមានជ័យ បានធ្វើការណែនាំដល់មន្ត្រីច្រកទាំងអស់ បន្តពង្រឹងអនុវត្តវិធានការសុខាភិបាល ខណៈពលករខ្មែរបន្តវិលមកពីថៃ មានចំនួនច្រើនរាល់ថ្ងៃ។

ឯកឧត្តម ប៉ែន កុសល្យ អភិបាលខេត្តឧត្ដរមានជ័យ នៅថ្ងៃនេះ បានឱ្យដឹងថា រំហូរពលករខ្មែរវិល មកពីថៃនៅតែមានចំនួនច្រើន ខណៈថ្ងៃបុណ្យចូលឆ្នាំកាន់តែខិតជិតដល់ ដែលក្នុងមួយថ្ងៃៗ​រាប់រយនាក់ ដែលការវិលត្រឡប់របស់ពួកគេ គឺដើម្បីមកចូលរួមអបអរពិធីបុណ្យចូលឆ្នាំ ដែលត្រូវ​បាន​រាជរដ្ឋាភិបាល បានអនុញ្ញាតឱ្យប្រារព្ធធ្វើឡើងវិញ បន្ទាប់ពីខកខានពីរឆ្នាំ។

ឯកឧត្តម បានឲ្យដឹងថា អាជ្ញាធរខេត្ត និងមន្រ្តីជំនាញពាក់ព័ន្ធនៅតាមច្រកទ្វារព្រំដែន បាន​ខិតខំ​សម្រួល​រាល់កិច្ចការងារផ្សេងៗជូនដល់ពលករទាំងអស់ ​ដែលបានឆ្លងដែនមកពីថៃវិញ ប្រកប​ដោយ​ភាព​ទន់ភ្លន់ ​និងបានធ្វើការពិនិត្យសុខភាព​ ធ្វើតេស្តគ្រប់ៗគ្នា ដោយការយកចិត្តទុកដាក់​ខ្ពស់​បំផុត នៅច្រកព្រំដែន ​មុននឹងឲ្យពួកគេវិលត្រលប់ទៅស្រុកកំណើតរៀងៗ​ខ្លួនវិញនោះ។

ឯកឧត្ដម ​បានបញ្ជាក់ថា ​ការដែលអាជ្ញាធរខេត្តធ្វើការ​រឹតបន្តឹង​យ៉ាងដូច្នេះ គឺដើម្បីធានា​ដល់​សុវត្ថិភាព​របស់ពលករគ្រប់រូប ​និងទប់ស្កាត់ការនាំយកជំងឺកូវីដ-១៩ទៅចម្លងចូលក្នុង​សហគមន៍​សារជាថ្មី ៕អត្ថបទ៖ ឃិន សារិទ្ធ