ក្រសួងសុខាភិបាលរបស់ប្រទេសលីបង់​បាននិយាយថា មនុស្សចំនួន៣៩​​ នាក់ត្រូវបានសម្លាប់នៅក្នុងថ្ងៃមួយ​​ផ្សេងទៀតនៃការវាយប្រហារដ៏ខ្លាំងក្លារបស់អ៊ីស្រាអែលនៅក្នុងប្រទេសលីបង់។

ក្រសួងនេះ​បាននិយាយថា ការវាយប្រហាររបស់អ៊ីស្រាអែលមួយទៅលើទីក្រុង Saksakiyeh ភាគខាងត្បូងបានសម្លាប់មនុស្សយ៉ាងហោចណាស់ ៧​​ នាក់រួមទាំងកុមារផងដែរ។​

កងកម្លាំងការពារអ៊ីស្រាអែល (IDF) បាននិយាយថា ខ្លួនបានកំពុងកំណត់គោលដៅលើក្រុមប្រដាប់អាវុធលីបង់ ហេសបូឡា​(Hezbollah)​ ហើយ​បានដឹងពីរបាយការណ៍ទាក់ទងនឹងគ្រោះថ្នាក់ដល់ជនស៊ីវិលដែលពុំ​មានជាប់ពាក់ព័ន្ធ​ក្នុងជម្លោះ​នេះ​។

កងកម្លាំងអ៊ីស្រាអែល និងក្រុមហេសបូឡា បានបន្ត​បាញ់ផ្លោង​ដាក់​​គ្នា ចាប់តាំងពីប្រធានាធិបតីអាមេរិក លោក Donald Trump បានប្រកាសកិច្ចព្រមព្រៀងបទឈប់បាញ់រវាងរដ្ឋាភិបាលអ៊ីស្រាអែល និងលីបង់ នៅថ្ងៃទី ១៦ ខែមេសា ២០២៦​​​នេះ។​​​

ការវាយប្រហារតាមអាកាសភាគច្រើនរបស់អ៊ីស្រាអែលបានវាយប្រហារភាគខាងត្បូងប្រទេសលីបង់ ដោយយោធាបាននិយាយថា វា​​គឺជាការវាយប្រហារលើហេដ្ឋារចនាសម្ព័ន្ធ និងមនុស្សដែលមានទំនាក់ទំនងជាមួយក្រុមហេសបូឡា កងជីវពល និងគណបក្សនយោបាយគាំទ្រដោយអ៊ីរ៉ង់។​

កាលពីថ្ងៃសៅរ៍ ទីភ្នាក់ងារសារព័ត៌មានរដ្ឋរបស់លីបង់ (NNA) បានរាយការណ៍ពីការវាយប្រហាររបស់អ៊ីស្រាអែលនៅទូទាំងភាគខាងត្បូង រួមទាំងនៅទីក្រុង​​​ Saksakiyeh ផងដែរ។

ក្រសួង​សុខាភិបាល​បាន​និយាយ​ថា ការ​​ឆ្មក់វាយប្រហារ​​​​នេះបាន​បណ្ដាល​ឲ្យ​មាន​អ្នក​ស្លាប់​ដំបូង​ចំនួន ៧ នាក់​ក្នុង​នោះ​មាន​ក្មេង​ស្រី​ម្នាក់ និង ១៥ នាក់​ រួមទាំង​កុមារ​​​៣​​នាក់​ផង​​បានរង​របួស៕