សារព័ត៌មានអ៊ីរ៉ង់បានរាយការណ៍ថា កងកម្លាំងឆ្មាំបដិវត្តន៍អ៊ីរ៉ង់ បានគំរាមកាលពីថ្ងៃសៅរ៍៩ឧសភា ថាខ្លួននឹងដាក់គោលដៅលើទីតាំងនានារបស់អាមេរិកក្នុងតំបន់មជ្ឈិមបូព៌ា ប្រសិនបើនាវាដឹកប្រេងរបស់ខ្លួន រងការបាញ់ប្រហារ ខណៈទីក្រុងវ៉ាស៊ីនតោន បន្តរង់ចាំចម្លើយតបរបស់ទីក្រុងតេអេរ៉ង់ចំពោះជំហរចរចាចុងក្រោយបំផុតរបស់ខ្លួន។
កងកម្លាំងឆ្មាំបដិវត្តន៍អ៊ីរ៉ង់ខាងលើនិយាយថា ការវាយប្រហារណាមួយលើនាវាដឹកប្រេងនិងពាណិជ្ជកម្មរបស់អ៊ីរ៉ង់ នឹងដុតបញ្ឆេះឲ្យមានការវាយប្រហារខ្លាំងក្លាវិញលើមួយក្នុងចំណោមមជ្ឈមណ្ឌលនានារបស់សហរដ្ឋអាមេរិកក្នុងតំបន់ និងនាវាសត្រូវ មួយថ្ងៃបន្ទាប់ពីអាមេរិកវាយប្រហារលើនាវាដឹកប្រេង២គ្រឿង របស់អ៊ីរ៉ង់ ក្នុងឈូងសមុទ្រអូម៉ង់។
លោកប្រធានាធិបតីអាមេរិក Donald Trumpបាននិយាយកាលពីថ្ងៃសុក្រថា លោករំពឹងថានឹងទទួលបានចម្លើយពីអ៊ីរ៉ង់ចំពោះសំណើចុងក្រោយបំផុតរបស់ទីក្រុងវ៉ាស៊ីនតោន សម្រាប់កិច្ចព្រមព្រៀងសន្តិភាពឆាប់ៗនេះ។
ប៉ុន្តែប្រសិនបើទីក្រុងតេអេរ៉ង់បានបញ្ជូនក្រុមអ្នកសម្របសម្រួលប៉ាគីស្ថានជាការឆ្លើយតបនោះ មិនមានសញ្ញាជាសាធារណៈអំពីបញ្ហានោះទេ ហើយរដ្ឋមន្ត្រីការបរទេសអ៊ីរ៉ង់លោក អាបាស អារ៉ាកជី (Abbas Araghchi) តាមសេចក្តីរាយការណ៍បានចោទសួរអំពីភាពជឿជាក់នៃការដឹកនាំរបស់សហរដ្ឋអាមេរិក។
យោងតាមទីភ្នាក់ងារសារព័ត៌មាន ISNA របស់អ៊ីរ៉ង់ លោក អារ៉ាកជី បាននិយាយនៅក្នុងការសន្ទនាតាមទូរស័ព្ទជាមួយសមភាគីទួរគីរបស់លោកថា ការកើនឡើងនៃភាពតានតឹងនាពេលថ្មីៗនេះដោយកងកម្លាំងអាមេរិកនៅឈូងសមុទ្រពែក្ស និងសកម្មភាពជាច្រើនរបស់ពួកគេក្នុងការរំលោភលើបទឈប់បាញ់ បានបន្ថែមមន្ទិលអំពីការជំរុញនិងភាពច្បាស់លាស់របស់ភាគីអាមេរិកនៅក្នុងផ្លូវការទូត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
