​ជឺ​ជិត​ស៊ូ៖ កីឡាការិនី​ជឺ​ជិត​ស៊ូ​ជម្រើសជាតិ​កម្ពុជា ខាន់ ចេ​សា បានឈ្នះ​មេដាយមាសនៃ​ការប្រកួត Pan Jiu-Jitsu Championship 2022 ដែលជា​ព្រឹត្តិការណ៍​កីឡា​ជឺ​ជិត​ស៊ូ​ត​ដ៏​ធំ​បំផុត​ប្រចាំ​អាមេរិក​ខាងជើង។ នេះ​ជា​លើកដំបូង​ហើយដែល ចេ​សា បានឈ្នះ​ជើងឯក​ក្នុង​ក្របខណ្ឌ​ខ្សែក្រវាត់​ខ្មៅនៃ​ព្រឹត្តិការណ៍​នេះ។​

​លោក Peter Khan ឪពុក​បង្កើត​កីឡាការិនី​វ័យក្មេង​រូបនេះបាន​បញ្ជាក់ថា កូនស្រី​របស់ខ្លួនបាន​ប្រកួត ២​ដងក្នុងចំណោម​បេក្ខភាព​មកពី​ជុំវិញ​ពិភពលោក​ជាង ៤,៦០០​នាក់ដែល​បាន​ចូលរួម​ព្រឹត្តិការណ៍​ដ៏​មាន​សារៈសំខាន់​នេះ ចាប់ពី​ថ្ងៃទី​០៦-១០ ខែមេសា ឆ្នាំ​២០២២ នៅ​រដ្ឋ​ហ្ល​រី​ដា សហរដ្ឋអាមេរិក។​ ​ជា​លទ្ធផល ខាន់ ចេ​សា បានឈ្នះ​មេដាយមាសលើ​ប្រភេទ​ទម្ងន់ ៥៣.៥​គីឡូក្រាមបន្ទាប់ពី​យកឈ្នះ​កីឡាការិនី​ប្រេ​ស៊ី​ល Thamires Aquino ក្នុង​វគ្គ​ផ្ដាច់ព្រ័ត្រ។ រីឯ​មេដាយ​សំរឹទ្ធ​លើ​វិ​ញ្ញា​នេះបាន​ទៅ​កីឡាការិនី​ប្រេ​ស៊ី​ល Andreza Morais និង​មេដាយ​សំរឹទ្ធ​ស្ទួនបាន​ទៅ​កីឡាការិនី​អាមេរិក Sofia Amarante​។​ ​បុរស​មានកំណើត​នៅ​រាជធានី​ភ្នំពេញ​ដដែល បាន​សម្ដែង​នូវ​មោទនភាព​ជាខ្លាំងដែល​កូនស្រី​របស់ខ្លួនបានសម្រេច​ជោគជ័យ​ថ្មី​មួយទៀត​ក្នុង​អាជីព មុន​នាង​ធ្វើដំណើរ​មក​កម្ពុជានា​ដើមខែ​ឧសភា ដើម្បី​ចូលរួម​ជាមួយ​ក្រុម​ជម្រើសជាតិ​ជឺ​ជិត​ស៊ូ​កម្ពុជាក្នុងការ​ប្រកួត​កីឡា​ស៊ី​ហ្គេមលើក​ទី​៣១ នៅ​វៀតណាមនា​ខែឧសភា​ខាងមុខ។​

​គួរ​ដឹងថា​ ខាន់ ចេ​សា បាន​បង្កើត​ប្រវត្តិ​លើកដំបូង​ឲ្យ​កម្ពុជា បន្ទាប់ពី​ដណ្ដើមបាន​មេដាយមាស​កីឡា​អាស៊ីឆ្នាំ​២០១៨ នៅ​ឥណ្ឌូណេស៊ី មុន​ដណ្ដើមបាន​មេដាយមាស​កីឡា​ស៊ី​ហ្គេមឆ្នាំ​២០១៩ នៅ​ហ្វីលីពីន។ ចេ​សា មាន​ឪពុក​ជា​ជនជាតិខ្មែរ និង​ម្ដាយ​ឈ្មោះ April Marie Khan ជនជាតិ​ម៉ិ​ក​ស៊ិ​ក​-​អាមេរិក។ រយៈពេល​ជាង ១០​ឆ្នាំនៃ​ការចាប់​អាជីព​កីឡា​ជឺ​ជិត​ស៊ូ នាង​ធ្លាប់​ឈ្នះ​មេដាយ និង​ពានរង្វាន់​ស្ទើរ​រាប់​ភ្លេចទាំង​ការប្រកួត​តំបន់អាមេរិក អឺរ៉ុប និង​ពិភពលោក៕

​អត្ថបទ៖ លី ឈុន​ឡា​