ប្រតិបត្តិការដ៏ស្មុគស្មាញរយៈពេលមួយថ្ងៃ ដើម្បីបញ្ជូនត្រឡប់ទៅវិញអ្នកជិះនៅលើនាវាទេសចរណ៍ដែលរងផលប៉ះពាល់ដោយការផ្ទុះឡើងវីរុស Hanta ជិតបញ្ចប់ហើយកាលពីល្ងាចថ្ងៃអាទិត្យ ទី ១០ ខែឧសភា បន្ទាប់ពីមនុស្ស ៩៤ នាក់ មានសញ្ជាតិផ្សេងៗគ្នាបានជិះយន្តហោះត្រឡប់ទៅប្រទេសវិញពីកោះ Canary របស់ប្រទេសអេស្ប៉ាញ។

អ្នកដំណើរបីនាក់នៅលើពីនាវា MV Hondius ជាស្វាមីភរិយាជនជាតិហូឡង់ និងស្ត្រីជនជាតិអាល្លឺម៉ង់ម្នាក់ បានស្លាប់ ខណៈអ្នកផ្សេងទៀតបានធ្លាក់ខ្លួនឈឺដោយសារជំងឺដ៏កម្រនេះ ដែលជាធម្មតា រាលដាលក្នុងចំណោមពពួកសត្វកកេរ។

គ្មានវ៉ាក់សាំង ឬការព្យាបាលជាក់លាក់ណាមួយសម្រាប់វីរុស Hanta ជាជំងឺរាតត្បាតនៅក្នុងប្រទេសអាហ្សង់ទីន ជាកន្លែងដែលនាវាបានចេញដំណើរកាលពីខែមេសា។ ប៉ុន្តែមន្ត្រីសុខាភិបាល បានបញ្ជាក់ថា ហានិភ័យសម្រាប់សុខភាពសាធារណៈសកលមានកម្រិតទាប ហើយបាននិយាយសម្រាលពីការប្រៀបធៀបទៅនឹងជំងឺរាតត្បាត COVID-19។

រដ្ឋមន្ត្រីក្រសួងសុខាភិបាលអេស្ប៉ាញ លោកស្រី Monica Garcia បានប្រកាសនៅលើកោះ Tenerife បន្ទាប់ពីអ្វីដែលលោកស្រីចាត់ទុកថាជាថ្ងៃដ៏លំបាក ដោយនិយាយថា ប្រតិបត្តិការបានជម្លៀសមនុស្ស៩៤នាក់ មកពី១៩ប្រទេស។ មន្ត្រីអេស្ប៉ាញ បាននិយាយថា ការជម្លៀសអ្នកដំណើរ និងនាវិកភាគច្រើននៅលើនាវាដែលមានមនុស្សជិត ១៥០ នាក់ មកពី២៣ប្រទេស នឹងបន្តរហូតដល់ជើងហោះហើរធ្វើមាតុភូមិនិវត្តន៍ចុងក្រោយទៅកាន់ប្រទេសអូស្ត្រាលី និងហូឡង់ នៅរសៀលថ្ងៃចន្ទនេះ។