អជ្ញាធរការបរទេសតៃវ៉ាន់ លោក Lin Chia-lung បានលើកឡើងនៅថ្ងៃចន្ទ (ទី១១ ខែឧសភា ឆ្នាំ២០២៦) នេះថា កោះតៃវ៉ាន់មានការជឿជាក់ លើការអភិវឌ្ឍស្ថិរភាពនៃទំនាក់ទំនងរបស់ខ្លួន ជាមួយសហរដ្ឋអាមេរិក ហើយសង្ឃឹមថា នឹងមិនមានអ្វី «អ្វីគួរឲ្យភ្ញាក់ផ្អើល» ស្ដីពីបញ្ហាទាក់ទងនឹងតៃវ៉ាន់ នៅពេលដែលប្រធានាធិបតីអាមេរិក លោក Donald Trump ទស្សនកិច្ចនៅប្រទេសចិន នាសប្តាហ៍នេះ។

លោក Trump នឹងមានវត្តមាននៅទីក្រុងប៉េកាំង ចាប់ពីថ្ងៃទី១៣ ដល់ថ្ងៃទី១៥ ខែឧសភា សម្រាប់ជំនួបកំពូលជាមួយប្រធានាធិបតីចិន លោក ស៊ី ជីនពីង (Xi Jinping) ជាទីដែលបញ្ហាកោះតៃវ៉ាន់គ្រប់គ្រងដោយលទ្ធិប្រជាធិបតេយ្យ ដែលប្រទេសចិនចាត់ទុកថា ជាទឹកដីរបស់ខ្លួននោះ ច្បាស់ណាស់នឹងត្រូវបានលើកយកមកពិភាក្សាមិនខាន។

ប្រទេសចិនមិនដែលបោះបង់ចោលការប្រើប្រាស់កម្លាំង ដើម្បីនាំយកកោះតៃវ៉ាន់ឲ្យមកស្ថិតនៅក្រោមការគ្រប់គ្រងរបស់ខ្លួនឡើយ ហើយកាលពីខែមេសា រដ្ឋមន្ត្រីការបរទេសចិនបានបញ្ជាក់ថា កោះតៃវ៉ាន់ គឺជា «ហានិភ័យធំបំផុត» នៅក្នុងទំនាក់ទំនងចិន-អាមេរិក។ សម្រាប់រដ្ឋបាលតៃវ៉ាន់ ដែនកោះមួយនេះតែងតែមិនទទួលយកការទាមទារអធិបតេយ្យដោយប្រទេសចិនឡើយ។

គួរបញ្ជាក់ថា សហរដ្ឋអាមេរិកត្រូវបានជាប់ចំណងដោយច្បាប់ ក្នុងការផ្តល់មធ្យោបាយដល់កោះតៃវ៉ាន់ ដើម្បីការពារខ្លួន ហើយរដ្ឋមន្ត្រីការបរទេសអាមេរិក លោក Marco Rubio បានលើកឡើងកាលពីសប្តាហ៍មុនថា ចាំបាច់ត្រូវមានស្ថិរភាព នៅទូទាំងច្រកសមុទ្រតៃវ៉ាន់។

អំឡុងពេលនិយាយទៅកាន់អ្នកសារព័ត៌មាន នៅសភា ក្នុងទីក្រុងតៃប៉ិ លោក Lin បាននិយាយថា រដ្ឋបាលកំពុងតាមដានយ៉ាងដិតដល់ ចំពោះកិច្ចប្រជុំ Trump-Xi នាពេលខាងមុខ។ លោកបានសង្កត់ធ្ងន់ថា៖ «យើងក៏បានរក្សាការទំនាក់ទំនងជាបន្តបន្ទាប់ជាមួយសហរដ្ឋអាមេរិកផងដែរ ទាំងតាមរយៈសេចក្តីថ្លែងការណ៍ជាសាធារណៈពីរដ្ឋាភិបាលសហរដ្ឋអាមេរិក ឬតាមរយៈបណ្តាញមិនមែនសាធារណៈ។ យើងមានទំនុកចិត្តលើការអភិវឌ្ឍប្រកបដោយស្ថិរភាពនៃទំនាក់ទំនងកោះតៃវ៉ាន់-សហរដ្ឋអាមេរិក»៕