ទាញព្រ័ត្រ៖ ការប្រកួតកីឡាទាញព្រ័ត្រឆ្នេរខ្សាច់ជ្រើសជើងឯកថ្នាក់ជាតិឆ្នាំ២០២២ បានបញ្ចប់ដោយជោគជ័យ ខណៈសមាគមកីឡាទាញព្រ័ត្រខេត្តស្វាយរៀង ខេត្តបាត់ដំបង និងខេត្តកំពតបានគ្រងជើងឯករៀងៗខ្លួនបន្ទាប់ពីឆ្លងកាត់ការប្រកួត ៣ថ្ងៃចាប់ពីថ្ងៃទី១០-១២ ខែមេសា ឆ្នាំ២០២២ នៅឆ្នេរឯករាជ្យ ខេត្តព្រះសីហនុ។
ព្រឹត្តិការណ៍ប្រចាំឆ្នាំលើកដំបូងនេះ មានក្រុមកីឡាទាញព្រ័ត្រមកពីខេត្តនានាចូលរួមដូចជាខេត្តស្វាយរៀង ត្បូងឃ្មុំ កំពង់ចាម ក្រចេះ កណ្ដាល កំពត ព្រះសីហនុ ព្រះវិហារ បាត់ដំបង និងក្រុមជើងទឹក ដែលបានធ្វើការប្រកួតប្រជែងលើ ៣វិញ្ញាសាយ៉ាងស្វិតស្វាញរហូតចម្រាញ់បានក្រុមជើងឯក លើវិញ្ញាសានីមួយៗកាលពីម្សិលមិញ។ សម្រាប់ជ័យលាភីនៃការប្រកួតនេះរួមមានវិញ្ញាសាជាក្រុម ៨នាក់ទល់ ៨នាក់ផ្នែកបុរស ចំណាត់ថ្នាក់លេខ១ បានទៅក្រុមកីឡាទាញព្រ័ត្រខេត្តស្វាយរៀង, លេខ២ ខេត្តត្បូងឃ្មុំ, លេខ៣ ខេត្តកំពង់ចាម និងលេខ៤ ខេត្តបាត់ដំបង។ រីឯវិញ្ញាសា ៨នាក់ទល់ ៨នាក់ផ្នែកនារី លេខ១ បានទៅក្រុមកីឡាទាញព្រ័ត្រខេត្តកំពត, លេខ២ ខេត្តស្វាយរៀង, លេខ៣ ខេត្តកណ្ដាល និងលេខ៤ ខេត្តព្រះវិហារ។ ដោយឡែកវិញ្ញាសាជាក្រុម ៨នាក់ទល់ ៨នាក់ចម្រុះបុរស-នារីវិញ ចំណាត់ថ្នាក់លេខ១ បានទៅក្រុមកីឡាទាញព្រ័ត្រខេត្តបាត់ដំបង, លេខ២ ខេត្តស្វាយរៀង, លេខ៣ ខេត្តកណ្ដាល និងលេខ៤ ខេត្តព្រះវិហារ។
ក្រោយបញ្ចប់ការប្រកួតឯកឧត្តមបណ្ឌិត មាស សារិន ប្រធានសហព័ន្ធកីឡាទាញព្រ័ត្រកម្ពុជាបានធ្វើការវាយតម្លៃខ្ពស់ ចំពោះការរៀបចំការប្រកួតកីឡាទាញព្រ័ត្រឆ្នេរខ្សាច់ជើងឯកថ្នាក់ជាតិលើកដំបូងនេះ ទោះបីការរៀបចំមិនទាន់ប្រើបច្ចេកទេសគ្រប់ ១០០% តែការប្រកួតបានដំណើរការដោយជោគជ័យ។ ទន្ទឹមជាមួយគ្នា ឯកឧត្ដមបានប្ដេជ្ញានឹងរៀបចំព្រឹត្តិការណ៍នេះកាន់តែស្ដង់ដារ និងល្អប្រសើរបន្ថែមទៀត ដើម្បីជំរុញការអភិវឌ្ឍវិស័យកីឡាទាញព្រ័ត្រឆ្នេរខ្សាច់នេះឲ្យកាន់តែរីកចម្រើន។ សូមបញ្ជាក់ថា ការរៀបចំការប្រកួតកីឡាទាញព្រ័ត្រឆ្នេរខ្សាច់គឺជាជំហានថ្មីមួយ របស់សហព័ន្ធកីឡាទាញព្រ័ត្រកម្ពុជាក្នុងឆ្នាំ២០២២ នេះ ស្របពេលសហព័ន្ធគ្រោងរៀបចំការប្រកួតក្រៅសាល និងក្នុងសាលបន្ដទៀត ក្នុងនោះការប្រកួតកីឡាទាញព្រ័ត្រក្រៅសាល សហព័ន្ធគ្រោងរៀបចំនៅទីលានប្រជល់ដំរីនាខេត្តសៀមរាប ខណៈការប្រកួតក្នុងសាល សហព័ន្ធគ្រោងរៀបចំនាខេត្តបាត់ដំបង។ នេះបើតាមការបញ្ជាក់បន្ថែមរបស់ឯកឧត្ដម មាស សារិន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
