កាលពីថ្ងៃអាទិត្យ (ទី១០ ខែឧសភា ឆ្នាំ២០២៦) អ៊ីរ៉ង់ បានព្រមានចក្រភពអង់គ្លេស និងបារាំងថា កងកម្លាំងប្រដាប់អាវុធរបស់ខ្លួន នឹងចាប់ផ្តើម «ការឆ្លើយតបយ៉ាងម៉ឺងម៉ាត់ និងភ្លាមៗ» ចំពោះនាវាចម្បាំងណាមួយដែលត្រូវបានបញ្ជូនទៅច្រកសមុទ្រ Hormuz បន្ទាប់ពីទីក្រុងប៉ារីស និងឡុងដ៍្រ បានបញ្ជូននាវាទៅកាន់តំបន់នោះ។

អនុរដ្ឋមន្ត្រីការបរទេស លោក Kazem Gharibabadi បានបង្ហោះសារនៅលើបណ្ដាញសង្គម X ថា៖ «យើងសូមរំលឹកពួកគេថា ទាំងក្នុងពេលវេលាមានសង្គ្រាម និងពេលវេលាមានសន្តិភាព មានតែសាធារណរដ្ឋឥស្លាមអ៊ីរ៉ង់ប៉ុណ្ណោះ ដែលអាចបង្កើតបាននូវសន្តិសុខ នៅក្នុងច្រកសមុទ្រនេះ ហើយខ្លួននឹងមិនអនុញ្ញាតឲ្យប្រទេសណាមួយជ្រៀតជ្រែក ក្នុងបញ្ហាបែបនេះជាដាច់ខាត»។

ទន្ទឹមនឹងនេះ នៅថ្ងៃអាទិត្យនោះ ប្រធានាធិបតីបារាំង លោក Emmanuel Macron បាននិយាយថា បារាំង «មិនដែលគិតទុកជាមុន» ពីការដាក់ពង្រាយកងទ័ពជើងទឹក នៅច្រកសមុទ្រ Hormuz ទេ ប៉ុន្តែជាបេសកកម្មសន្តិសុខដែលនឹងត្រូវបាន «សម្របសម្រួលជាមួយអ៊ីរ៉ង់»។

នៅឯសន្និសីទសារព័ត៌មាន ក្នុងទីក្រុង Nairobi ប្រទេសកេនយ៉ា លោក Macron បាននិយាយថា លោកនៅតែប្រកាន់ខ្ជាប់នូវជំហររបស់លោក បន្ទាប់ពីអ៊ីរ៉ង់បានព្រមានអំពី «ការឆ្លើយតបយ៉ាងម៉ឺងម៉ាត់ និងភ្លាមៗ» ចំពោះការដាក់ពង្រាយនាវាចម្បាំងណាមួយរបស់បារាំង ឬអង់គ្លេស នៅក្នុងផ្លូវទឹកយុទ្ធសាស្ត្រនេះ។

គួរបញ្ជាក់ថា ចក្រភពអង់គ្លេស និងបារាំង កំពុងដឹកនាំកិច្ចប្រឹងប្រែង ដើម្បីបង្កើតសម្ព័ន្ធភាពអន្តរជាតិមួយ ក្នុងគោលបំណងធានាដល់សុវត្ថិភាព នៅច្រកសមុទ្រ Hormuz ប៉ុន្តែអាចធ្វើទៅបាន លុះត្រាតែកិច្ចព្រមព្រៀងសន្តិភាព រវាងសហរដ្ឋអាមេរិក និងអ៊ីរ៉ង់ ត្រូវបានឈានដល់ប៉ុណ្ណោះ៕