​បាល់ទាត់៖ ​ក្រុម​អេ​ស្ប៉ា​ញ​ដែល​គេ​មើលរំលង Villarreal បានធ្វើឱ្យ​បាល់ទាត់​អឺរ៉ុប​ភ្ញាក់ផ្អើល​ក្រោយ​ទម្លាក់ Bayern Munich ឡើង​វគ្គ​ពាក់កណ្តាល​ផ្តាច់ព្រ័ត្រ UEFA Champions League ជា​លើកដំបូង​ក្នុង​រយៈពេល ១៦ឆ្នាំ​។ ​​យកឈ្នះ​កាលពី​ជើង​ទី ១ នៅ​ទឹកដី​អេ​ស្ប៉ា​ញ ១-០ កាលពី​សប្តាហ៍​មុន ក្រុម​របស់លោក Unai Emery មាន​ប្រព័ន្ធ​ការពារ​ដ៏​រឹងមាំ​ទប់ស្កាត់​ក្រុម​ម្ចាស់ផ្ទះ​ដែល​មានឱកាស​ជាច្រើន​ក្នុង​ការរក​គ្រាប់​បាល់​។

​​យ៉ាងណាក្តី​ខ្សែប្រយុទ្ធ​ប៉ូឡូញ Robert Lewandowski បានធ្វើឱ្យ Bayern Munich មានសង្ឃឹម​ឡើងវិញ​តាម​ការ​ស៊ុត​បញ្ចូល​ទី​នាំមុខ​នៅ​នាទី​ទី ៥២ និង​ជា​គ្រាប់​តាម​ស្មើ​សរុប​ទាំងពីរ​ជើង​។​ ​​មិន​ដល់​ម៉ោង​បន្ថែម​កាត់សេចក្តី​ទេ Villarreal ក៏​តាម​ស្មើ​វិញ​នៅ​នាទី​ទី ៨៨ ដោយ Samuel Chukwueze ធ្វើឱ្យ​ស្ថានភាព​នៅ​កីឡដ្ឋាន Allianz Arena របស់ Bayern Munich ហាក់​ស្ងាត់ជ្រងំ​។​ ​​គ្រូបង្វឹក Villarreal លោក Unai Emery និយាយថា អារម្មណ៍​នៅពេលនេះ​ពិបាក​នឹង​ថ្លែង ក្រុម​របស់លោក​មកដល់​វគ្គ​នេះ​ទាំង​លំបាក​វេទនា ហើយ​ទម្លាក់ Bayern Munich នៅពេលនេះ​សុទ្ធតែជា​រឿង​ដែល​យើង​គិតថា​មិនអាច​ទៅរួច តែ​វា​បានកើត​ឡើង​ហើយ​។

​​សូមបញ្ជាក់ថា​ អតីត​គ្រូបង្វឹក​ក្រុម​កាំភ្លើង​ធំ Arsenal លោក Unai Emery គឺជា​មនុស្ស​ដែលមាន​បទពិសោធន៍​ខ្ពស់​នៅ​ក្របខណ្ឌ​អឺរ៉ុប​ជាពិសេស UEFA Europa League ដែល​លោក​ធ្លាប់​ដឹកនាំ Sevilla ឈ្នះ​ជើងឯក ២លើក និង Villarreal ឈ្នះ​ជើងឯក​រដូវ​កាល​មុន​។ ​​ជុំ​បន្ត Villarreal នឹងត្រូវ​ជួប​ជាមួយ​ក្រុម​ឈ្នះ​រវាង Liverpool រឺ Benfica រាត្រី​នេះ ខណៈ​ក្រុម​របស់លោក Jurgen Klopp នាំមុខ ៣-១ កាលពី​ជើង​ទី១៕

​អត្ថបទ​៖​នាង សុភា​វុ​ធ